Shillong, Nohprah 05
U Myntri Rangbah u Conrad K Sangma u la ong ba ka Sorkar Jylla ka la dep phah jingthoh sha ka Sorkar Pdeng tang hadien khyndiat sngi ba la ïakynduh bad ka Khasi Authors’ Society (KAS) halor ka jingdawa jong ka ban wanrah ïa ka Bill (aiñrew) ha Parliament haba ïadei bad ka ktien Khasi ban pynrung hapoh ka Riti Synshar jong ka ri.
U Myntri Rangbah u la pynshai ïa kane haba kylli halor ka jingkynnoh u President ka Khasi Authors’ Society (KAS) u Dr DRL Nonglait ba ka Sorkar Jylla ka khlem phah jingthoh ei ei sha ka Sorkar Pdeng wat hadien ka jingïakynduh bad ka KAS.
U Myntri Rangbah u la ong ba kita kiba kynthoh ki la dei ban wad jingtip na ka Sorkar ym ban shu kynthoh khlem nongrim, namar ka Sorkar ka la phah jingthoh hadien ba la ïakynduh bad ka KAS.
U la ïathuh ba ka Sorkar Jylla ym tangba ka la wanrah ïa ka rai kaba la mynjur da ka Ïingdorbar Thawaiñ ka Jylla ban kyrpad ïa ka Sorkar Pdeng ban pynrung ïa ka ktien Khasi bad Garo hapoh ka Khyrnit Baphra ka Riti Synshar ka ri hynrei ka la ju buddien ruh bunsien haba ïadei bad kane ka mat.
