Mawkyrwat, Nohprah 05
Ha ka Sngi Ba-ar ki briew ba leit sha ïew Mawkyrwat ki la lap ïa ka metïap jong uwei u rangbah kaba la thiah bad dem khrup hajan jong ka basa die doh jong kane ka ïew.
Ki pulit jong ka Mawkyrwat ha ka por mynsngi jong ka 1 baje eiei ki la ïoh jingtip ba la lap ïa kawei ka metïap jong u rangbah najan basa doh ha ïew Mawkyrwat.
Hadien ba ki la wan poi sha kane ka jaka bad hadien ka jingtohkit, ki pulit ki la ïathuh ba une u rangbah uba la khlad u dei ba la tip kyrteng kum u Tyngshaiñlang Lyngdoh Marshilong, 30 snem ka rta na ka shnong Pyndenspar, Jakrem ha South West Khasi Hills District.
Katkum ka jingïathuh na ka liang jong ka kmie une u rangbah, la ong ba u Tyngshaiñlang Lyngdoh Marshillong ha kine ki khyndiat sngi kata naduh ka 2 tarik mynta u bnai ym tip u don aïu ha mynsiem hynrei u la shu pynlut por tang ha kaba dih kyiad bad khlem bam eiei shuh.
Ka kmie ka la ïathuh ruh ba naduh ka janmiet jong ka 4 tarik kaba dei ka Sngi U Blei, u Tyngshaiñlang u la mih ban leit kai bad u khlem wan phai shuh sha ïing. Dei tat haduh ka 5 tarik ba la lap ïa u da ki briew najan ka basa doh ha Mawkyrwat ha ka por kumba 11 baje eiei mynstep ba u la don hapdeng ka jingbuiad bha.
Ha kaba ïadei bad kane ka jingkhlad jong une u rangbah, ki bahaïing hasem kim don ka jingsuba sniew ïano-ïano bad ïa ka met une u rangbah la aiti noh sha ki bahaïing ba kin pyndep ïa ka niam ka rukom.
