Jowai, Nohprah 05
U CEM jong ka Jaiñtia Hills Autonomous District Council (JHADC), u Ma Thombor Shiwat u la pynpaw ïa ka jing-sngewkhia halor ka jingïakhih khah-khah da ki nongtrei jong ka JHADC halor ka jingbym ïoh tulop, ïoh ba kan don ka jingleh politik da mano-re-mano lyngba jong ki na bynta ka jingmyntoi jongno-re-jongno.
Ïa kane u Ma Thombor Shiwat u la pynpaw ha ka Sngi Ba-ar, haba ai jingkren ha ka jingïalang plie paidbah ïa ka Additional Office Building jong ka JHADC.
Kane ka jingkren ka la wan hadien ba ki nongtrei jong ka JHADC ki khlem wan ïashim bynta ha ka jingïalang plie paidbah ïa ka shlem treikam thymmai jong ka JHADC.
U CEM u la kyntu ïa ki ophisar bad nongïalam jong ka JHADC Staff Association ba kin nym ïalam bakla ïa ki nongtrei jong ka JHADC namar ba ka EC ka khlem shong kli-kti haba ïakhun ïa ka jingïoh tulop ka jong ki.
Shuh shuh ha kaba ïadei bad ka jingkynthoh jong kiba bun, ba balei donkam ban tei ïing paki thymmai ha ka jaka ban siew shwa ïa ka tulop ba dangsah jong ki nongtrei ka JHADC, u Ma Thombor u la pynshai ba ïa ka skhim ban shna ïa ka ïing paki ka la don ha ka guideline ne kyndon ka jong ka, ka bym lah ban pynkynriah (transfer) ne siew sha ka tulop.
U la pynkynmaw ruh ïa ka jingshim kylliang na ka SAG na ka bynta ban siew tulop ïa ki nongtrei jong ka JHADC, hynrei u la shah ai mukotduma pynban ha u Ma Lakhon Biam da kaba kynnoh ba u CEM ka JHADC u pyndonkam bakla ïa ka Fund SAG sha ka tulop, hynrei u CEM u la ong ba ha ka jingshisha ym dei ka jingpyndonkam bakla hynrei ka jingshim kylliang bad hadien ba la ïoh ïa ka bhah la pynphai noh ïa kata ka pisa.
“Ka por ka dang biang, to ngin pynduh pyndam ka jingbym ïasngewthuh jingmut, ka jingrah lama ïong, ka jingïakhih kam long kaba donkam namar kaba dei hi ban ïoh lada ym pynlong da ki jingïakhih ruh ngin ïoh beit”, la ong u Ma Thombor bad kyntu jur ïa ki nongïalam bad nongtrei ka JHADC ban ïatreilang na ka bynta ka bha ka miat jong ka council.
