Shillong, Nohprah 05
Ka MCTA, Sengkmie, ka la pynbna ban weng noh ïa ka Non Cooperation Movement (NCM) pyrshah ïa ka North Eastern Hills University (NEHU) hadien ka rai kaba la shim ha ka jingïalang Extended Executive Committee (EEC) kaba la long ha ka Sngi Ba-ar.
Ka NCM kaba la sdang ha ka1 tarik Nailar, 2023, ka long ka jubab halor ka jingpyntreikam be-aiñ ïa ka New Education Policy (NEP) 2020, khamtam haba ïadei bad ka Fourth Year Undergraduate Programme (FYUP).
Ka rai ban weng ka la sdang na ka Post-Facto Approval ba dang shen na bynta ka jingpyntreikam ïa ka NEP-2020 ha ka jingïalang Emergent Academic Council, NEHU, ha ka 26 tarik Risaw, 2023.
Katei ka jingweng ïa ka NCM ka la treikam mardor hadien ba kut ka jingïalang.
Hapdeng ka jingweng noh ïa ka NCM, ka MCTA ka ïeng skhem ha ka nongrim ban shimkhia ïa kiwei pat ki jingeh ba ïadei bad ka NEP-2020.
Ka seng ka la ong ba kan ïai bteng ban ïakren bad ka NEHU bad lada donkam, bad ka Sorkar khnang ban pynbeit ïa ki mat kiba dang shateng.
Ka MCTA ka pynpaw ruh ka jingsngewnguh sha baroh ki dkhot na bynta ka jingkyrshan jong ki ïa ka NCM.
Ha kajuh ka por, ka seng ai khublei ïa kito kiba la kitbok kitrwiang ïa ka, ki kynhun ki samla pule, kynhun seng ka imlang-sahlang bad ki lad pathai khubor ïa ka jingkyrshan jong ki.
Kane ka long katkum ka kyrwoh na u General Secretary, Dr. A.W. Rani.
