Shillong, Nohprah 05
Hadien ka jingpynbna na ka jingmih ka ilekshon shapoh ka ïingdorbar thawaiñ jong ka jylla Mizoram la ïohi ba ka saiñpyrthei hapoh katei ka jylla ka la kylla kynsan ha kaba ka seng saiñ pyrthei kaba thymmai ha Mizoram kata ka Zoram People’s Movement (ZPM) ka la jop kput ha katei ka ilekshon bad lyngba katei ka ilekshon la ïohi ruh ba ki paidbah katei ka jylla ki la kyntait ïa ki sengsaiñ pyrthei kiba heh kata ïa ka Indian National Congress (INC) bad ïa ka Bharatiya Janata Party(BJP).
Ha kaba ïadei bad kane, na ka liang u Myntri Rangbah ka jylla, u Conrad K Sangma u la ong ba ym lah satia ban shu peit tang na kawei ka ilekshon kaba la long hynrei kaei kaba hap ban sngewthuh ka long ba man ka ilekshon ka ïapher kawei na kawei bad kawei ka jylla ruh ka ïapher na kawei pat.
“Ngim lah ban shu peit ïa ka jinglong tang lyngba kawei ka ilekshon hynrei ngi hap ban sngewthuh ba baroh ki ilekshon ki ïapher bad baroh ki jylla ki ïapher bad ki jinglong jingman ha kaba ïadei bad ki ilekshon ki ju ïapher na kawei ka jaka sha kawei ka jaka”, la ong u Myntri Rangbah.
Ha kaba ïadei bad ka jingleh sniew jong ka Congress ha ki 5 tylli ki ilekshon shapoh ka ïingdorbar thawaiñ kata ha Telangana, Rajasthan, Mizoram, Chhattisgarh, Madhya Pradesh, na ka liang u Mynti Rangbah u la ong um kwah ban kren eiei halor ka jingleh sniew jong katei ka seng ha kitei ki ilekshon namar ba kata ka dei ka kam jong ka seng ban rai kumno ba kin leh ban jam shakhmat.
“Ngam don eiei ban ong namar kata ka dei ka kam seng jong ka Congress bad ki hap ban rai kumno ba kin lah ban ïaid shakhmat, bad ngam sngewtynnad ban kren eiei shaphang kano kano ka sengsaiñ pyrthei”, la ong u Myntri Rangbah.
