Shillong, Nohprah 05
U Myntri Rangbah ka Jylla Conrad K Sangma u la ong na ka bynta ban pynstep ha kaba ïadei bad ka rukom thungkam thungjam, na ka liang jong ka Sorkar Jylla ka la pynkylla ïa ka rukom treikam ka Meghalaya Public Service Commission (MPSC) bad ïa ka rukom thungkam baroh da kaba thaw bun ki Recruitment Board.
Haba kren bad ki lad pathai khubor ha ka Sngi Ba-ar, u Myntri Rangbah u la ong, “Ngi la pynkylla ïa ka rukom treikam ka MPSC bad ka rukom thungkam baroh kawei da kaba pynkha kham bun ki Board khnang ba kan pynsted bad pynkloi ha kaba ïadei bad ka thungkam thungjam. Ha ka por ba la mih ka Health Recruitment Board, ka kam thung ïa ki doktor kaba la sahteng haduh san snem, la lah ban pyndep noh tang hapoh lai bnai”.
U Conrad u la ong ba ka jingthmu hi ka long ban pynthikna ba ka rukom thungkam thungjam kan ïaid beit ïaid ryntih bad kumta khnang ban pynthikna ba ki jingthungkam kin ïaid beit, ka jingpynkha ïa ki Board bapher bapher kan ailad ban pyntreikam bad thungkam mar-mar bad kaei kaba la leh mynta ka dei shibynta jong ka jingpynkylla.
Ha kajuh ka por u la ong ba ki don ruh ki skul Sorkar, ki Higher Secondary School kiba hap ban thung ïa ki Principal bad ka kam ka la sahteng la san snem bad ka MPSC ka la hap ban kit ïa ka lyngkor bakhia. Khnang ban pynthikna ba kam dei ban slem ka jingthungkam, ka sorkar ka la sdang ban thung ïa ki board bathymmai ban pynkylla ïa ka rukom thungkam.
