Jowai, Nohprah:
Ka Thomas Jones Synod College, Jowai ka la ai jinghikai ïa ki khynnah pule jong ka kolej halor ka rukom pynkhreh ïa ka eksam CUET ne Common University Entrance Test kaba long ka jingkhang ban ïoh bteng ïa ka jingpule shajrong hadien ka Class-XII.
Ïa kane ka jinghikai la tip kum ka Career Counselling cum CUET Awareness Programme kaba la long ha Hall ka Thomas Jones Synod College ha ka 4 tarik Nohprah.
Ïa ka jingïalang la pynïaid da ka Vice Principal ka Higher Secondary Section ka Dr. I Dkhar ha ka jingdon ki spah ngut ki khynnah pule kane ka kolej bad ki nonghikai.
U Principal ka Kolej u Dr. DG Lyngdoh ha ka jingkren lamkhmat u la ong, ka jingbtin lynti bad jinghikai ka long kaba donkam bha ïa ki khynnah ba kin sngewthuh bad tip kaei ka jingthrang bad kaei kin jied na ka bynta ka lawei ka jong ki.
Ha kaba ïadei bad ka CUET u la ong, ba ka long kaba donkam bha ïa ki khynnah pule ban ïakhun ïa kane eksamin namar ka long kaba donkam (compulsory) katkum ki kyndon jong ka UGC bad ruh ka dei kawei na ki kyndon jong ka National Education Policy (NEP) kaba ka kolej ka la pyntreikam mynta u snem.
Ki ‘riew shemphang kiba la ai jingbatai ki long ka Kong S Phawa, Assistant Professor Convener Career Counselling, Thomas Jones Synod College, ka Kong TB Lyngdoh, Assistant Lecturer (Political Science Department) bad ka Kong R Lapasam, Assistant Professor (HoD Botany).
Baroh ki ‘riew shemphang ki la ong ka jingpynlong ïa kane ka Counselling Career ka long ba bun na ki samla ki duh jingkyrmen bad kim tip shano ban leit, kumno ban jied ïa ki jingpule katkum ka jingthrang ka jong ki. Ki la ong ba don shibun ki lad jingpule ba ki samla pule ki lah ban leit hadien ba ki la pyndep ïa ki jingpule Class XII.
Ki la kyntu ïa ki khynnah ban long kiba nang ban jied ïa ka jingpule kaba ki kwah ym ban shu bud tynneng ïa ki paralok, bad ki dei ruh ban don ka thong ha ka jingim ka jong ki bad ba kin minot thop ha ki jingpule ym ban long ki samla kiba duh jingkyrmen khnang ba kin poi sha ka thong kumba ki angnud ha ka jingim ka jong ki.
Ka Kong R Lapasam ka la batai bniah shaphang ka rukom pyndap ïa ki form bad rukom pynkhreh ïa ka eksam CUET kaba pynïaid lyngba ki kor kompiwtor.
