Shillong, Nohprah 06
Hadien ka jingmih jong ki katto-katne ki seng kiba la leit ban lum pisa beaiñ na ki nongkhaïi bad dukan kiba don ha nongbah Shillong, na ka liang jong ka Sorkar Jylla ka la dep ban bthah ïa ki bor pynïaid district bad ruh ïa ka tnat pulit ba kin long kiba peitngor ban peit ba kan nym don kum kane ka jingleh beaiñ khlem da ïoh jingbit.
Haba kren sha ki lad pathai khubor ha ka Sngi Balang, u Symbud Myntri Rangbah ka jylla u Bah Prestone Tynsong u la ong, “Ngi na ka liang jong ka Sorkar ngi la dep ban bthah ïa ki bor pynïaid district bad ka tnat pulit ba kin peitngor bad khanglad ïa ka jinglum pisa beaiñ jong kino-kino ki seng bad ki ‘riew shimet ha ka kyrteng jong ka jinglum synñiang bad ban leh eiei pyrshah ïa kum kine.”
Lah ban pynkynmaw ba dang shen, ki pulit ki la ïoh ban kem noh ïa ki katto-katne ngut ki samla kiba leit lum pisa beaiñ bad khrong synñiang na ki nongkhaïi ha nongbah Shillong ha ki kyrteng jong ki kynhun seng bapher bapher.
U Bah Prestone u la ong ba ka long kaba beaiñ ban leit lum pisa ne khrong synñiang na ki dukan ne ki nongkhaïi khlem da ïoh jingbit na ki bor pynïaid district, namar ka aiñ hi kam shah ban shu leit lum katba mon na ki dukan ne ki nongkhaïi khlem da shim ne pan jingbit shwa.
“Peit ka la shai kdar, ngi la dep bthah ïa ki bor district bad ka tnat pulit ba kin leh eiei pyrshah ïa ki kynhun kiba dawa pisa ha Shillong,” la ong u Symbud Myntri Rangbah.
