Shillong, Nohprah 06
Ka Khasi Students’ Union (KSU) ha ka Sngi Balang ka la leit ban ïakynduh ïa u Director ka NEIGRIHMS, Prof. (Dr.) Nalin Mehta halor ka jingmad jingeh jong ki kyrtong trai Jylla ban leit thoh ïa ka eksamin sha kiwei pat ki Jylla.
“Ngi ïoh ka jingujor na kiba bun ngut ki kyrtong kiba thep kam ha ka kyrdan Grade ‘B’ bad ‘C’ hapoh NEIGRIHMS ha kaba ki briew jong ngi ki hap ban leit sha kiwei-kiwei ki Jylla ban ïakhun ïa ka eksamin,” la ong u General Secretary ka KSU, samla Donald V. Thabah haba kren sha ki lad pathai khubor hadien ba ïakynduh ïa u Director.
U la ong ba kane ka la ktah shi kat dei ïa ki trai Jylla khamtam kito kiba wan na ki longïing kiba duna ka ïoh ka kot. Haba kdew ba ki jaka thoh eksamin ki kynthup ïa ka New Delhi, Jorhat, Guwahati bad Shillong, u samla Thabah u la ong, “Ban leit kum sha Jorhat, kin hap leit lypa shi sngi shuwa, ban sah bad nangta sa ïaleh eksam bad hadien kata sa wanphai…kane kan ktah bha khamtam ïa kito kiba duna ha ka ïoh ka kot.”
Ha ka jingïakren bad u Director, u la sngewthuh ba ka NEIGRIHMS ka la ai pynïaid ïa katei ka eksam ha kawei ka ‘Testing Agency’.
“Katkum ka jingpynpaw u Director, u ong namarba duna ki jingdon-jingem kum ki ‘Computer Centre’ hapoh ka Jylla, kumta kim banse ban phah shabar. Ngi la pynsngew ba ki jaka lei ki bun ha Shillong hynrei u Director u la ai jubab ba lehse haba la ai ha ka kompeni, dei ka kompeni ka ban kynjoh sha kine ki jaka kiba don hapoh ka Jylla ban pynlong ïa ka eksamin,” u la ong.
U General Secretary u la ong ruh ba u Director u la kular ban ïaid shakhmat bad ka ‘Check List’ – ban wad jingtip halor ki ‘Computer Centre’ kiba don hapoh Shillong bad kiwei-kiwei ki jaka hapoh ka Jylla, ha kajuh ka por ban ïasoi noh da ka soskular ka jingïateh bad ki khnang ban ïoh pynlong beit ïa ki eksam hapoh ka Jylla.
Haba pynpaw ba watla ka por haba ïadei bad katei ka eksamin ka la dier (9 tarik – ka sngi long eksam), u samla Thabah u la ong ba ka seng ka la ban jur ba nangne shakhmat lada don kino-kino ki eksam, ka NEIGRIHMS ka dei ban kyntu ïa ka ‘Agency’ kaba ïoh pynïaid ïa ka eksamin ban wad shuwa ïa ki ‘Computer Centre’ kiba don hapoh ka Jylla khnang ban pynsuk ïa ki trai Jylla kiba kwah ïakhun ïa ki eksam.
“U Director u la ong ba hapoh Shillong ka jynjar ban ïoh namarba ka St. Anthony’s, NIT, NEHU ki don la ki jong ki eksam bad kumta kim ïoh ban pynlong ha kitei ki jaka. Ha Shillong ki ban ïakhun ïa ka eksamin ki long 170 ngut, 200 ngut ha Jorhat, 200 ngut ha Guwahati bad 200 ngut ha New Delhi,” u la ong. Shuh shuh utei u nongïalam ka KSU haba pynsngew ba kiba bun ki eksamin mynta hap ban leh lyngba ka kor ‘Computer’, la ka long ka CUET ne kiwei-kiwei, u la ong ba ka Sorkar Jylla kan hap ban khmih bniah ïa katei ka bynta da kaba pynbun ïa ki jaka thoh eksam (Computer Centre) ban ïoh pynlong ïa ki eksamin bapher-bapher hapoh ka Jylla.
“Ngi la ban jur ba haba ïadei bad ka jingthep kam bapher-bapher, ka NEIGRIHMS ka dei ban ai lad ïa ki briew jong ngi katkum ka bhah thung kam. U Director u la ban jur ba ka 44% yn ym pynduh, bad kin ïoh hi ki trai Jylla,” la bynrap u samla Thabah.
