Shillong, Nohprah 06
Ha kawei ka jingjia pluh ïing, kawei ka ïing sah ba la ai wai bad long trai da ka Kong Virginia Nongkynrih kaba don ha ka shnong Mawpat ka la kylla dpei lut hadien ba ki thylliej ding kiba rhem ki la bam shngaiñ ïa katei ka ïing.
Kane ka la jia ha ka step jong ka Sngi Balang ka 6 tarik mynta u Nohprah ha ka por 7 baje mynstep eiei bad katei ka ïing ka dei kaba don lai kynrad ki nongshong wai.
Ha katei ka jingjia watla ki nongshong wai ki don ha ïing hynrei ym shym la don satia kano-kano ka jingjia kaba sngewsih namar ba ki lah ïoh ban mih na ïing ha shwa ban kem ka ding. Katba baroh ki tiar ki tar ki la ingkhong lut khait bad katkum ka jingsuba, la suba ba ka jingkem ding jong katei ka ïing dieng ka dei na ka daw ka jingthut ha ka bor ilektrik.
Na ka liang u Rangbah dong jong ka Circle-1, u Bah Firstborn Marbaniang, u la ïathuh ba katei ka ïing ka dei ka ïing kaba la ai wai bad kaba don lai ngut ki kynrad ha kaba ki briew kiba shong ba sah wai ha kitei ki ïing ki dei kiba duna ha ka ïoh ka kot kiba shu im jakpoh bad pyndap ïa ka ïing ka sem da kaba bylla sngi.
U Bah Marbaniang u la pynpaw ka jingsngewsih bad ka jingduh kaba khraw na ka bynta jong kitei ki longïing kiba la duh noh ïa ki jingdon jingem jong ki ha ki thylliej ding.
“Ka jingdum ka la wan ban tap ïa kine ki lai tylli ki longïing bad ka jingsngewsih kaba khraw bha bad na ka liang jong ngi ka dong ruh ka long haba ngi ïakren bad ki, ki la pynpaw ba kim don eiei shuh ha ki pla jong ki, kata ka dei kaba khraw eh ba kim ïoh shuh haba ka ding ka la wan ban klang”, la ong u Bah Marbaniang.
U Bah Marbaniang u la kyrpad ruh sha ki bor kiba halor bad sha ka sorkar ba kan noh jingïarap lem sha kitei ki longïing longsem.
U Bah Marbaniang u la ïathuh ba ki briew kiba shong ba sah ha kitei ki lai tylli ki kynrad ïing ki long kumba 11 ngut naduh ki longkmie, ki longkpa, ki heprit bad iwei i tymmen.
“Ngi ainguh ïa u Blei ba u la ri la sumar ïa ki bad u la pyllait ïa ki na kaba sniew baroh ba iwei ruh im don ba mynsaw ha kaba ïadei bad ka jingpluh jong kane ka ïing”, la ong u Bah Marbaniang.
Na ka liang u Rangbah Shnong jong ka shnong Mawpat, u Bah Juda Wahlang u la ong ha kaba ïadei bad ka jingsdang jong katei ka jingpluh katkum ka jingkylli na ki briew kiba shong ba sah ha kitei ki ïing, ka dei na ka daw ba don jingthut ka bor ilektrik haduh ba ka la pynlong ban pynjulor lut shisyndon ïa katei ka ïing.
U Bah Wahlang u la ïathuh ba ha katei ka jingpluh ding, ki dei ki para marjan-marpa bad ki shipai BSF kiba la ïarap ban tem ïa katei ka ding ba kan lait pur sa sha kiwei pat ki jaka da kaba kynshait um.
U Bah Wahlang u la ong ba na ka liang ka Dorbar Shnong kan sa noh jongïarap katba ka lah sha kitei ki longïing longsem kiba mad ha katei ka jingjia bad na ka liang jong ka shnong kan sa ïakren ruh bad ki bor kiba halor ban pynïoh jingïarap na ka bynta kitei ki longïing.
“Namar kine ki longïing kiba sah wai hangne ki dei na ki longïing kiba duk bad kiba donkam ïa ka jingïarap lehse, lah ban ong ba ki dei kiba kamai mynstep bad bam da miet”, la ong u Bah Wahlang.
Shuh shuh na ka liang u Bah Wahlang u la kyrpad ruh ïa ka sorkar ba kan kner lem ïa ka kti kamon ka kti kadiang ban noh jingïarap sha kitei ki longïing longsem bad u la kyntu ruh ïa ki nongshong shnong ba lada ki don ïa ki ïing ki sem kiba la rim khamtam ki ïing dieng, ki dei ban peit bha ha ka liang ka bording ilektrik.
U Bah Wahlang u la kyntu ruh ïa ka sorkar ba ka la donkam ba na ka liang jong ka sorkar ba kan peit ha kaba ïadei bad ki kali pynlip ding ba kan pyrkhat thymmai kata ban buh ïa kitei ki kali pynlip ding sha ki bynta bapher bapher jong ka sor Shillong khnang ba lada don kano kano ka jingjia pluh ding, kitei ki kali pynlip ding ki lah ban poi ha ka por kaba biang.
