Jowai, Nohprah 06
Ka Krishi Vigyan Kendra, Wahïajer ha ka 5 tarik Nohprah ka la pynlong ïa ka Mela ki nongrep krai ne ka Millet Kisan Mela bad rakhe ruh ïa ka World Soil Day ne ka sngi kyrpang jong ka khyndew.
Ka mat pdeng ka long “Soil and Water: A Source of Life.”, ne “Khyndew bad Um: Ki tyllong jong ka Jingim”.
Ha kane ka sngi la donlang ki nongrep na ki artylli ki district jong ka East Jaiñtia Hills District bad West Jaiñtia Hills District ha ka jingïalang kaba la long ha phyllaw ka shlem treikam KVK kaba don ha Wahïajer, West Jaiñtia Hills District.
U District Horticulture Officer Bah S Rani ha ka jingkren u la ong, u krai u ïarap ha kiba bun ki jait jingpang bad u la kyntu ïa ki nongrep ban phai dien biang bad pyrshang ban pynroi bad thung ïa u krai khnang ban ïoh bam bad tei ïa ka met ka phad. U la ong ba u krai u ïarap ruh ïa ki briew kiba don jingpang shini.
Ka Kong Lucy Lakiang, District Agriculture Officer, East Jaiñtia Hills District ka la kren halor ka jingdonkam ban ïada bad pynneh pynsah ïa ka mariang bad ïa ki um ki wah namar ki dei ka tyllong jong ka jingim u briew.
Shwa kane, la ïoh ka jingkren pdiang na u Dr. D Pasweth, Senior Scientist & Head bad ka Kong T Surong na ka shnong Khanduli ka la batai ïa ka jingshem jong ka ha ka jingrep krai nalor kiwei kiwei.
