Jowai, Nohprah:
U CEM ka JHADC u Ma Thombor Shiwat u la pynpaw ïa ka jingsngewdiaw halor ka jingshah kynthoh nongkhrong haba ki leit dawa pyllait ïa la ka bhah jong ka council na ka sorkar Jylla.
Ïa kane u Ma Thombor Shiwat u la pynpaw haba kren ha ka jingïalang plie paidbah ïa ka Additional Building Office jong ka JHADC kaba la tei ha ka jinglut kaba 3 klur 38 lak tyngka ha ka jingïalang kaba la long ha phyllaw ka council ha ka Sngi Ba-ar.
Haba kren halor ka jingduh tulop jong ki nongtrei ka JHADC, u Ma Thombor u la ong ba ka Executive Committee (EC), kumba ka long mynta ka leit nguh leit dem haduh ba ki la shah kynthoh nongkhrong.
“Mar sien poi u CEM, ki EM bad ki katto katne ngut ki ophisar JHADC, la shah kynthoh ba la wan ki nongkhrong bad kane ka pynsngewsih haduh katta katta ïa ka EC, ba mih kata ka kyntien nongkhrong,” la ong u Ma Thombor.
Halor ka jingshah kynthoh nongkhrong, u CEM u la pynksan ba ki dawa ïa ka hok ka jong ki, katkum ka riti synshar jong ka ri India ym ba ki khrong na ka sorkar Meghalaya.
U la ong ka sorkar Meghalaya kam long kata ka sorkar kaba lah ban pyndap pynbiang lehse ïoh ba ka don hapdeng ka jingduk jingkyrduh ne ka jingduna pisa.
U la pyntip ba na ka liang ka sorkar ka la khot ïa ki ban ïakren ha kaba ïadei bad ka tulop jong ki nongtrei, bad ka sorkar la ong ban ïaishah bad la kumno kumno hapoh jong une u snem yn pyndep ïa ka jingsiew tulop ba dangsah jong ki nongtrei.
