Shillong, Nohprah 06
Kat haduh mynta ki nongïalam ba ha khliehduh jong ka seng kieng atiar ka Hynñiewtrep National Liberation Council (HNLC) kim pat ai ktien satia ne pyntip ïa ka rai jong ki halor ka jingkyrpad jong ka Sorkar ba kin wan ban ïadon bynta lang ha ka miej ïakren ïasuk.
“Haduh mynta, ngim pat ïoh satia kano-kano ka jingai ktien na ka liang jong ki nongïalam ka HNLC. Na ka liang jong ka HNLC ka la dep ban pyntip sha ka sorkar ba kino-kino ki jingdonkam ne jingai ktien na ka seng kan wan beit lyngba u ksiang ba ki la thung kata u Bah Sadon Blah, uba dei ruh u President ka seng Hynñiewtrep National Youth Front (HNYF),” la ong u Symbud Myntri Rangbah ka Jylla u Bah Prestone Tynsong haba kren sha ki lad pathai khubor ha ka Sngi Balang.
“Ngi la dep ban ïakren bad ki nongïalam ka HNLC ki bym pat dei kiba ha khlieh duh, kumta mynta na ka liang jong ka sorkar ngi kwah ba ka jingïakren ïasuk kan dei ban long bad ki nongïalam ba hakhlieh duh ka HNLC ha kaba ngin lah ban ïakren markhmat ban tip bad sngewthuh ïa kaei kaba ki kwah,” u la ong.
Ha kaba ïadei bad ka jingdawa ban map noh ïa baroh ki mukotduma ne kam bymman ba la buh da ka HNLC, u Symbud Myntri Rangbah u la ong, “Ïa baroh kine ki mat dawa lah ban ïakren ynda ki wan sha ka miej ïakren bad ynda ki nongïalam ba ha khlieh duh ka HNLC ha ryngkat bad u ksiang jong ngi na ka sorkar bad kumjuh ruh na ka Sorkar Kmie kin shong ban ïakren bad ïatai, kin sa wan pat sha ngi ka Sorkar bad pyntip ïa kaei ka jingai jingmut jong ki”.
“Nang ïai buh ka jingkyrpad sha ki nongïalam ba ha khlieh duh ka HNLC ba ka jingkhang ka dang plie na ka bynta ka jingïakren. Ka jingïakren ha ka kylla kaba nyngkong ka la dep ban long, kumta ngi kwah ban ïohi sa ïa ka jingïakren ha ka kylla ba ar, ba lai, ba saw tat haduh ba ngin da poi sha ka bynta ban shim pat ïa ka rai,” la ong u Bah Prestone.
