Shillong, Nohprah 06
Ki Executive Member (EM) ka Khasi Hills Autonomous District Council (KHADC) ha ryngkat u Syiem ka Hima Mylliem, ki Myntri ka Hima ha ka Sngi Balang ki la leit ban hiar sha Ïewduh ban khynra laisen khaïi hadien ba ki ïohpdiang ïa ka jingujor na kawei ka seng kaba la tip kyrteng kum ka Khun Kynthei U Hynñiewtrep Association ba ki bar jylla ki la leh donbor palat ha katei ka ïew.
Ka KHADC ka la ïoh ban pdiang ïa katei ka shithi ha ka 20 tarik u Naiwieng 2023. Hynrei kaba lyngngoh ha katei ka jingwan khynra jong ka Council sha Ïewduh, ki nongïalam jong ka Khun Kynthei U Hynñiewtrep Association ki khlem wan mih satia sha katei ka jingkhynra.
Ha katei ka jingkhynra laisen khaïi jong ka KHADC la lamkhmat da u Executive Member ba dei khmih ïa ka tnad Khaïi-Pateng, u Bah Gigur Myrthong ha ka jingsynranlang ruh da u Bah Fantin J. Lakadong, u Bah Gabriel Wahlang bad ki bor pulit ka Enforcement Wing jong ka KHADC.
Haba kren sha ki lad pathai khubor hadien ka jingkhynra ïa ki kot ki sla, u Bah Gigur Myrthong u la pynpaw ïa ka jingsngew lyngngoh ba ka seng jong ki Khun Kynthei U Hynñiewtrep Association kaba la ujor pyrshah ïa kitei ki dukan bar jylla ba kim don ïa ki kot ki sla kiba biang hynrei katei ka synjuk pat kam shym la wan satia sha katei ka jaka ban pynithuh ne kdew ïa kita ki dukan ki bym don ïa ki laisen khaïi kumba ki la kam ha ka shithi ujor ba la phah sha ka KHADC.
“Na kata ka daw ngi la wan mynta ka sngi ban wad ïa kita ki jingshisha halor ka jingpyntip jong ki hynrei ngi lap ba na ka liang jong kiba wan ujor shapoh ka Council ki khlem wan mih bad kane ka long kaei-kaei kaba ym sngewtynnad”, la ong u Bah Myrthong.
U Bah Myrthong u la ong ba haba kino-kino ki wan ban ai jingujor ha kaba ïadei bad kano-kano ka kam, ki dei ban wan lang khamtam eh ba katei ka shithi ka dei kaba la ai ha ka kyrteng jong ka kynhun.
U Bah Myrthong u la ong ba na ka liang jong ka Council ka la leh ïa kaba donkam eh kata ban khmih ha kaba ïadei bad ki laisen khaïi jong ki bar jylla. Ha katei ka jingkhynra, la lap ba ki la don katto-katne ki bar jylla kiba ym pat pynthymmai ïa ki kot ki sla jong ki bad ki la don ruh pat ki ba rjylla kiba la shong dukan khlem ka laisen khaïi, kumta na ka liang jong ka Council ka la ïaid shakhmat katkum ki kyndon jong ka Council.
U Bah Myrthong u la ïathuh ba ha katei ka shithi jingujor, ka synjuk ka la ujor ha kaba ïadei bad ka laisen khaïi, laisen bylla bad ka jingdon jong ki dukan kiba la leh ‘benami’ ha Ïewduh.
Shuh shuh u Bah Myrthong u la ong ba kane ka dei ka sien kaba nyngkong ba ka Council kan ïohpdiang ïa kum kine ki jingujor. Kumta nangne shakhmat lada kum kine ki seng ki bym don ka jingsoi kyrteng ne ka muhor ki wan ban ujor sha ka Council, ka Council kan ym shim khia shuh lada kim pynbiang ïa ki kot ki sla bad pyntip hangno kita ki dukan ki don bad ruh ban wan pynithuh ïa kita ki dukan.
“Hadien habud haba ki wan ha kane ka rukom ngin nym shimkhia ruh hynrei ki dei ban ai ka jingbatai kaba bniah jong kita ki dukan ki bym don laisen khaïi bad lada kim ai ka jingbatai, na ka liang jong ngi, ngin nym treh shuh ban shim khia”, la ong u Bah Myrthong.
