Shillong, Nohprah 06
Ka Meghalaya High Court ha ka Sngi Balang ka la ai hukum ban khot hajir ïa u SP ka East Jaiñtia Hills ban pan jingpynshai ha kaba ïadei bad ka jinglap u Justice BP Katakey (Retired) ïa u dewïong ba la lum thup hajan bad hadien ka Don Bosco College ha Byndihati.
Ha ka kaiphod kaba 18 jong u, u Justice Katakey u la kdew ba ha ka jingleit jurip ïa ka thaiñ Khliehriat, u la ïohi ïa ka jingbun ka jinglum thup ïa u dewïong ba dang shu dep tih harud ka surokbah hajan ka lad Don Bosco bad hadien ka Don Bosco College, Byndihati. La ïohi ruh ba ka la don ka jingtei ïa ka jaka thew (weigh bridge) hadien ka Don Bosco College kaba long hapdeng ka jaka ba la lum thup ïa u dewïong ba la tih be-aiñ bad hajan ki jaka ba don dewïong. Ka jingdon jong u dewïong ba la tih be-aiñ, u bym dei uba la tih mynshwa lane uba la shah kurup, ka pyni shai ba ka jingtih dewïong be-aiñ ka dang ïaid. La lap ruh ïa ki dak shaka jong ki kali heh ha katei ka thaiñ ba don ka jinglum thup ïa u dewïong bad kane ka pyni ïa ka jingkynrei ka jingkit dewïong be-aiñ.
Ryngkat bad kine ki jingthoh, la ai ruh ïa ki dur ki dar jong ki jaka ba la pynlong kum ki jaka ban lum thup ïa u dewïong. Na ka liang u Justice Katakey u la pan da ka kaiphod na u Deputy Commissioner ka East Jaiñtia Hills bad un hap ban jubab hapoh shi taïew ba kumno ka jingtih dewïong be-aiñ ka dang bteng.
Haba jubab, na ka liang ka sorkar ka la ong ba la dep ban ai da ka FIR ha thanat Khliehriat halor ka jingdon jong utei u dewïong, bad ki heh na ka Directorate of Mineral Resources, Umkiang check-gate ki la leit thew ïa utei u dewïong bad la shem ba u don haduh 4,900.20 Metric Tonne. La batai ruh ba utei u dewïong ba la lum thup u dei jong uwei u briew ïa uba la tip kyrteng kum u Mul Sympli (NGT Serial No. 1049, co-ordinates N 25.3249, E 92.373775), bad ba u dewïong ba la thew da u Majistor ha u snem 2019 u long 4,800 Metric Tonne, bad katkum ka jingthew biang ba la leh ha ka 25.08.2023, u dewïong uba don u long 4,790 Metric Tonne, bad namarkata, u dei u dewïong ba la don jingkheiñ bad ym uba la tih be-aiñ.
Hynrei, katkum ka jingtip ba la ai da u ‘Investigating Officer’ sha u Deputy Commissioner ka East Jaiñtia Hills ha ka 21 tarik Naiwieng, 2023, ka jaka ba la lap ïa utei u dewïong ba la lum thup ka long Latitude 25.3326445 bad Longitude 92.3734301, bad kam ïahap satia bad ka jaka ba la kam ba dei u dewïong jong u Mul Sympli.
Kane ka jinglap, ryngkat bad ki jingkynthoh ha ka kaiphod u Justice Katakey, ka long kaba shyrkhei, la ong ka High Court. Ka la ong ba kane ka kdew ba ka jingtih dewïong be-aiñ ka dang ïaid khlem don kano-kano ka jingteh lakam watla ki don ki rai jong ka Supreme Court, NGT bad ka High Court ba la khang ïa ka jingtih dewïong be-aiñ. “Ka jinglap ïa u dewïong hadien ka Don Bosco College, Byndihati ka pyni kumno kita ki heh sorkar ki la treikam khamtam u khlieh duh ki pulit ha ka distrik, kata, u Superintendent of Police, bad namarkata, donkam ïa ka jingpynshai,” la ong ka High Court.
Na ka liang ka High Court ka la ong ba kan ap sa ïa ka kaiphod bathymmai jong u Justice Katakey halor kane. Hynrei ha kajuh ka por, ka la ai hukum ba u SP ka East Jaiñtia Hills u dei ban wan mih hi dalade hakhmat ka ïingbishar ha ka 11 tarik Nohprah, 2023 ha ka por 10:30 mynstep bad ban pynshai halor utei u dewïong.
