Shillong, Nohprah:
Ka North Eastern Police Academy (NEPA) ha ka Lah Sngi U Blei ka la pynbna ba la plie ïa ka 53rd Basic Course na ka bynta ki pulit Deputy Superintendent of Police (Dy SP) bad Sub Inspectors (SI) ha ka jingïalang kaba la long ha NEPA, Umsaw, Ri Bhoi District.
Ïa kane ka jingai jinghikai la plie da u Symbud Myntri Rangbah ka jylla u Bah Prestone Tynsong uba khmih ruh ïa ka tnat Kam Pohïing kum u Kongsan ha ryngkat ka jingïadon lang u Director General of Police (DGP) ka Meghalaya u Dr L.R Bishnoi, u Director ka NEPA u Anurag Agarwal, ki heh pulit bad kiwei kiwei.
U Bah Prestone uba la plie ïa kane ka jingai jinghikai u la ban jur ba ka long kaba kongsan ba ki pulit kin ïoh ki jinghikai pyntbit khnang ba kin lah ban pynneh ïa ka shongsuk shongsaiñ.
“Nga dap da ka jingsngewsih ban ïohi ba ki pulit kin shah kynthoh wat haba ki trei shitom ïa ka kamram kaba la bynshet ha ki, ha kaba ki buh shwa sharud ïa la ka ïing ka sem tang na ka bynta ban shakri ïa ka ri. U la ai mynsiem ïa ki ophisar kiban shah hikai ba kim dei ban duh jingkyrmen hynrei ban bteng ka trei shitom ha kaba shakri ïa la ka ri,” la ong u Bah Prestone.
U la kyntu ruh ïa kine ki ophisar ki ban shah hikai hapoh ka NEPA ba ki dei ban long kiba don akor bad ba kin kyntiew ïa ka bor jong ka jingmut jingpyrkhat bad ba kin leh bha ha ka jingshah hikai ka jong ki.
U Bah Prestone u la ban jur ïa ka jingdonkam ban tip bha ïa ka aiñ ka kanun bad kumjuh ruh ban don ka jingïadei kaba ïajan bad ki paidbah ha ka kam shakri bad ong ruh ba kin sdang nalade ban wanrah ïa ka jingkylla bad ban ïoh ïa ka jinghikai na ka Academy kaba long kaba bha tam hapoh ka ri.
Ha kane ka jingai jinghikai, na ka liang u Course Director ka 53rd Basic Course Dr. ML Zou, Assistant Director (Lecturer) u la pyntip ba baroh ki ban ïoh jinghikai ki long 95 ngut, kata na Meghalaya ki don 6 ngut ha ka kyrdan Dy SP bad 39 ngut ha ka SI, na Manipur ki long 8 ngut kum ki SI bad 14 ngut kum ki Dy SP, na Assam ki don tang 15 ngut ha ka kyrdan SI bad Nagaland ki don 9 ngut ha ka kyrdan Dy SP bad 4 ngut ha ka kyrdan SI.
