Nongpoh, Nohprah 06
U President ka Meghalaya People Coal Trader Welfare Organisation, u Bah John Frankie Rymbai ha ka jingpyllait khubor mynta ka sngi, u la buh ka jingkyntu ïa ka sorkar jylla ba kan sdang biang ban ai ïa ki ‘Challan Dewïong’ kiba khlem pat pyndonkam na ka jinglilam kaba la pynlong ha u bnai Jymmang bad Naiwieng mynta u snem.
U Bah John Frankie Rymbai uba dei uwei na ki nongkhaïi u la ïathuh ruh ba ki bun ki nongkhaïi ki la wan ban kynduh ïa u bad banjur ba ka sorkar ka dei ban ailad biang ban khaïi ïa u dewïong sha kylleng ki bynta jong ka ri da ka lynti kaba long katkum ka aiñ, kata da kaba pyndonkam lyngba ki ‘Challan Dewïong bad ki Bills’, khamtam kumba ka aïom lehkmen ka lajan sdang artad.
U la ong ruh ka jingkhaïi ïa u dewïong katkum ka lynti jong ka aiñ, kan ïarap ban kyntiew ïa ka pla tyngka jong ka sorkar jylla bad kan ïarap ruh ban pynduh ïa ka jingduhnong ka sorkar na ka jingkhaïi tuh ïa utei u marpoh khyndew bad bynrap ba ka jingbym kitkhia jong ki ophisar sorkar ba dei khmih ha ki jaka thew lane exit gate, ka long kumba pynshlur ïa ka jingshalan tuh ïa utei u marpoh khyndew kaba la wanrah ruh ïa ka jingduhnong kaba khraw ïa ka pla tyngka jong ka sorkar jylla.
Namar kata, khnang ba ka sorkar jylla, ki nongkhaïi bad baroh kiba don bynta ha kane ka kam kin ïoh jingmyntoi lang, u Bah John Frankie Rymbai u buh ka jingkyntu jur ïa ka sorkar jylla ba kan shim khia ban pynurlong noh ïa kane ka kam ban khaïi ïa u dewïong.
