Nongstoiñ, Nohprah 06
U Superintendent of Police (SP) ka West Khasi Hills u la pyntip paidbah bad bthah ruh ïa baroh ki nongshong shnong ba kin long kiba adkar bad leh khuid ha ki jaka paidbah, ki lynti syngkien, ki surok bad ki jaka jngohkai pyrthei kiba don hapoh ka district.
Ha ka kyrwoh khubor ba la pyllait, u SP u la kyrpad ruh ïa ki paidbah ban kiar na ka jingleh kulmar, pynmynsaw ne pynthut ïa ki nongleit nongwan lane ban pynjaboh bad kren ki ktien jakhlia ne hylla ha ki surok bad jaka jngohkai kiba don hapoh ka West Khasi Hills District.
Ka kyrwoh ka ong ruh ba kino-kino kiba pynkheiñ bad bym kohnguh ïa kane ka hukum ba la pynmih, ki lah ban shah kem bad shah set patok hapoh ka kyndon U/S 102 of the Meghalaya Police Act, 2010 bad ki lah ban shah daiñ kuna ruh T.5000.
Nalor nangta katei ka kyrwoh khubor ka la bthah ruh ba baroh ki nongwan jngohkai pyrthei ne ki tourist kiba wan sha ki jaka jngohkai, la bthah ba kin wanrah la ki jong ki jong ki pla hapoh ki kali jong ki ban pyndonkam ban lum ïa ki ñuit kum ki plastik, ki bitor um, ki plastik chips bad kiwei kiwei da kaba kin pynthikna ba ki la bret bha ha ki jaka buh ñuit ba la buh kyrpang.
