Shillong, Nohprah 06
U nongaibuit ka tnat Pule-Dangle ka Sorkar Jylla, Bah HM Shangpliang uba dei u MLA barim ka Mawsynram u la ong ba mar shu kut ilekshon, u synsar ba dei mar khlaw bad uba la kylla mar rep u la hiar noh haduh T.30 shi kilo.
Ïa kine ki kyntien u Bah Shangpliang u la kren kum u kongsan haba plie pyrda ïa ka kyn -roh jingker bad ïa ka jingbuh ñiut jong ka Raid Lynshiang SSA & RMSA Secondary School Mawsna kaba hap ha Mawkynrew constituency, East Khasi Hills District.
Kane ka kynroh jingker ïa ka baranda jong ka skul bad ka jaka theh ñiut la ai da u Conrad K Sangma lyngba u Bah Kansing Lynshiang ba un pynbha ïa ka skul lyngba ka skhim Chief Minister Development Fund (CMDF).
Haba ai jingkren ha ka jingïalang u Bah Shangpliang u la pynkynmaw ha ka por ba u long MLA u la ïasaid ha ïingdorbar ban pynkylla mar rep ïa ki mar khlaw bad ka sorkar ka la sngap. Hynrei u sngewlyngngoh ba mar shu kut ilekshon u synsar uba poi haduh T.150 shi kilo mynta u la hiar dor haduh T.30 shi kilo.
Kumta haba u sngewkhia ïa ka jingeh jong ki nongrep u la leit ban pynpaw sha ka sorkar ba kan bthah ïa ki ophisar tnad Rep ka Riang ba kin hap leit wad bniah balei ka hiar ka ïew synshar.
Haba ïadei bad ka pule puthi, u Bah Shangpliang u la ong ba namar ka jingjot ki ïing skul ha nongkyndong ka la pynlong ïa ka tnad ban ïakynduh ïa u Myntri Rangbah ka jylla u Conrad Sangma ban ai ïa ki kyrteng skul kiba la sniew ki ïing skul.
U la sngewkmen ba ka sorkar mynta ka la khot ‘tender’ ban shna thymmai ïa ki skul bad kan dang ai pisa shuh shuh sa ïa kiwei ki skul.
“Nga sngewsih ban tip ba ka jylla ka dei kaba bun bha kiba pep skul noh shiteng por namar don ki kmie ki kpa haba ki khun ki phiel ki phah ap masi noh” u la ong.
Katba u Bah Kansing Lynshiang, u kyrtong ka NPP uba shah rem ha ilekshon MLA u la ong ba watla ka dei ka jingshna kaba rit hynrei ka long kaba itynnad kaba u la kyrpad na u Myntri Rangbah ka jylla u Conrad K Sangma.
“Don kiba ong balei leit ai skhim ïa ka shnong Mawsna kaba ki paidbah ki khlem kyrshan ha por ilekshon, hynrei nga ong kum u shakri uba don jingkitkhlieh ïa ka thaiñ, ngan shakri ïa ki shnong ha Mawkynrew konstitwensi haduh ba ki paidbah kin sa kyrshan ïa nga ha kawei ka sngi” u la ong.
