Jowai, Nohprah:
U CEM ka Jaiñtia Hills Autonomous District Council (JHADC) u Ma Thombor Shiwat u la plie paidbah ïa ka shlem treikam bathymmai jong ka JHADC ha ka jingïalang kaba la long ha phyllaw ka council ha ka 5 tarik Nohprah.
Ïa kane ka shlem treikam bathymmai la tei da ka G+3 Building bad la ïoh jingïarap na ki skhim MDC ba la bei tyngka lyngba ka Central Grant jong u snem 2018-2019, 2019-2020 bad 2020-2021 ha ka jinglut kaba 3 klur 38 lak tyngka.
Ïa ka jingïalang la pynïaid da u Ma Dikil Pohchen, Assistant Chief Engineer, bad la ïoh ka jingkren na u Ma Phasmoon Dkhar, EM In-charge CWD, u Ma Lasky Rymbai, Deputy CEM bad u Ma Thombor Shiwat, CEM JHADC.
U Ma Thombor ha ka jingkren u la ong, bun ki para dkhot ki kren danda ba kane ka EC kaba ïalam da u Thombor Shiwat kan nym ïoh ban shong ha kane ka shlem treikam thymmai. Hynrei da ka jingtrei shitom u EM in-charge, kane ka ïing paki ka la urlong bad la lah ban plie paidbah bad pyndonkam ïa ka nangne shakhmat.
Ha kaba ïadei bad ka bynta ban plie ïa kane ka ïing paki, u la ong ba don kiba ai jingmut ban khot sngewbha da kino-kino ki Myntri sorkar ban plie ïa kane ka ïing thymmai, hynrei hadien ki sngew ba kam long kaba donkam namar ka sorkar jylla kam don ka jingkitkhlieh na ka bynta ka jingïoh ne jingduh bad na ka bynta ka jingdonkam jong ka council. Kumta la pynbeit ban plie hi da u CEM jong ka JHADC namar dei ka council hi kaba wad ki lad ki lynti da kaba khate na ka SAG jong ki 29 ngut ki MDC na ka bynta ban tei ïa kane ka shlem treikam thymmai.
U EM in-charge u Ma Phasmoon Dkhar ha ka jingkren u la ïathuh ba ïa kane ka shlem treikam bathymmai jong ka JHADC la sdang ban tei ïa ka ha u snem 2020 hynrei namar ka COVID-19 bad kiwei kiwei ki kynrum kynram la slem noh ïa ka jingtei hynrei da ka jingtrei shitom ki MDC, ki ophisar bad nongtrei ka JHADC la lah ban pyndep noh ïa ka ha une u snem.
U la pyntip ba u CEM ryngkat ki dkhot ka Executive Committee (EC), ki Secretary kin shong ha kane ka ophis kaba thymmai kaba don lang ruh ïa ka kamra Conference Hall.
