Shillong, Nohprah 06
Ka jingeh kaba la mad da katto-katne ngut ki samla kiba pule ha Synod College Shillong ka la poi syndon sha ki tyndong shkor u Myntri ka tnat Pule-Dangle u Rakkam A Sangma bad ki bor bahalor ka North Eastern Hill University (NEHU) namar ki don ki samla kiba khlem ïoh ban thoh ïa ka eksamin jong ka semester kaba pynlong hapdeng ka 16 tarik Naiwieng bad 8 tarik mynta u Nohprah.
Ha ka shithi ba la phah sha u Myntri ka tnat Pule-Dangle, la ong ba kine ki samla ki khlem lah ban leit thoh ïa ka eksamin semester jong ki na ka daw ba ki khlem ïoh ïa ka ‘admit card’ kaba ki dei ban ïoh. Kaba pynlong ïa ki samla ban phah tuklar ha ki bor kiba kham halor ka dei namarba la kynnoh ba ki bor pynïaid ka Synod College Shillong ki khlem ai ka jubab kaba hun halor ka jingbym ïoh jong ki ïa ki ”admit card” ba kin ïoh leit thoh ïa ka eksamin kaba ki la pynkhreh.
La ong ba napdeng kiba bun ki samla ba ju tista bha ban shong ha kamra klass naduh u snem 2021, don ruh iwei ba la pyndep ïa ka semester ka balai kaba la pynlong ha u Naiwieng, 2022.
Hynrei ynda la poi ka eksamin jong ka semester ka basaw ha u Jymmang, 2023, ki khlem ïoh ‘admit card’ wat haba la siew biang por ïa ka bai pule (fees). Haba ïadei bad kane, na ka liang ka kolej ka la batai ïa ki ban ïaid beit sha ka semester ka basan bad kin sa thoh pat ïa ka eksamin jong ka semester ka basaw ynda la wan ka semester ka bahynriew ha u snem 2024.
La ong ba ynda ki la bud ïa ka jingbatai ka kolej bad leit sdang ïa ka semester ka basan ha u Naitung 2023, kine ki samla ki mad jingeh biang kumjuh namar ym shym la ai ‘admit card’ ïa ki ban thoh eksamin kaba la buh ban pynlong hapdeng ka 16 tarik Naiwieng bad 8 tarik Nohprah, 2023.
Kumta la ong ba namarba ki jingud bad jingkyrpad jong ki kam seisoh bad khlem ïoh ïa ki jubab kiba pynhun, kim banse ban phah tuklar noh ha ki bor ba kham shalor.
La ong ba kine ki samla ki la pynlut ka por bad pisa tyngka ba la bei da ki kmie ki kpa naduh ka bai sah hostel, bai siew ha kolej bad kiwei kiwei ki jinglut bad banjur ban pynbeit lem ïa kane ka jingeh kaba ki mad.
Ha ka jingkyrpad ba la phah sha u Myntri ka tnat pule puthi, la bsut lang ki kot ki sla kiba ïahap kynthup ki sakhi haba ïadei bad ki jingsiew kiba ki la dep siew na ka bynta ka semester basaw bad semester basan ha ryngkat ka thup kyrteng ki samla pule kiba shahktah bad buh ka jingkyrpad ban tuklar lem khang ban lah ban pynbeit. La phah ruh kum ka jingpyntip sha ki bor ba dei peit jong ka NEHU ïa ka tnat kaba pynlong eksamin bad ophis u Vice Chancellor.
