Shillong, Nohprah 06
Ka Sorkar Jylla shen kan sa lum ïa ka jingïakynduh lang bad kiba bun ki kynhun kiba dei ki nongdonbynta ha kane ka Jylla ban ïathir sani halor ka aiñ Meghalaya Residents Safety and Security Act khamtam halor ka jingmih mawjynthut ban buh ïa ki ‘facilitation centre’ ha ki surokbah ha kane ka Jylla kiba hap ïaid lang da kiwei pat ki Jylla.
Haba ïakren bad ki nongthoh khubor, u Symbud Myntri Rangbah u Bah Prestone Tynsong uba peit ïa ka tnat Pulit ha Jylla, u la ong ba ka jingpynphai ka tnat Korbar Ri (MHA) ïa ka MRSSA sha ka Jylla ha ryngkat katto-katne ki jingkdew ka dei beit khamtam eh halor ka jingdon ka kyntien ‘facilitation centre’ kaba dei ban don ha ki surokbah ban peit ïa ka jingwan ki briew sha kane ka Jylla namar ba ka MHA ka kdew ba kane ka dei ka bynta kaba ïatyngkhuh bad ki kyndon riti synshar khamtam namarba ka Meghalaya ka dei ka Jylla kaba kiwei pat ki Jylla ki hap ïaid lyngba.
Kumta u la ong ba shen yn sa lum ïa ka jingïalang bad ki kynhun bapher bapher ban ïakren ïa kane bad na ka liang u Myntri Rangbah un sa leh ïa kane ha kine ki sngi ban sa wan.
U la ong ba ka ILP ka ïapher na ki kyndon kiba don hapoh ka MRSSA namarba ka ILP ka wan lyngba ka aiñ ka Sorkar Pdeng ha ryngkat ki kyndon.
Kumta u la ong ba ka Jylla ka khlem shongthait ban ïai pynsngew ïa ka jingdawa ban pyntreikam ïa ka ILP ha kane ka Jylla.
