Tura, Nohprah 06
U MLA barim ka Rongara Siju, u Rophul S Marak, u la ai da ka jingujor (FIR) ha kaba ïadei bad ka jingjyllei ka jingtih dewïong be-aiñ ha South Garo Hills.
Ïa kane ka FIR la ai ha ka Sngi Balang ha u heh pulit ba dei peit ïa ka thanat ha Nongalbibra. Katkum ka FIR, la ong ba ka jingtheh ïa u dewïong ba dang shu dep tih ka bteng ha ka thaiñ Nongalbibra, Jadigittim, Garegittim, Daramngdura bad ki jaka ba marjan watla ka jingkhang ban tih dewïong ka dang ïaid.
“Kumba ka long mynta, ka dang don ka PIL (No. 2 of 2022) bad kiwei ki PIL kiba dang sahteng ha ka ïingbishar jong ka jylla kiba ïadei bad ka jingtih bad jingkit dewïong be-aiñ. Watla kine ki mukotduma ki dang sahteng, kam don satia ka jingsangeh ban tih bad jingkit dewïong be-aiñ khamtam ha Nongalbibra bad ki jaka ba marjan,” la ong utei u MLA barim ha ka FIR.
Namarkata, u Marak, ha ka FIR, u la kyntu ïa ki pulit ban pynrung ïa katei ka FIR bad ban pynlong da ka jingtohkit bad kumjuh ruh ban leh eiei pyrshah ïa kito kiba donkti ha katei ka kam be-aiñ.
U Marak u la ïathuh ba ka don ruh sa kawei ka FIR halor kajuh hi ka mat ba la ai da u Nokma ka Garegittim A’king kaba hap ha Nongalbibra.
