Los Angeles:
U Zac Efron un sa shah pynkup burom da ka Hollywood Walk of Fame ha kaba kane ka jingpynkup burom ia u Zac kan long ha ka 11 tarik mynta u bnai.
Une u tyngshop uba la paw pyrthei ha ka kam ak phlim hadien ba ula shim bynta ha ki phlim ka Disney un sa shah pynkup burom ha ka 6426 Hollywood Boulevard halor ka jingnoh synñiang jong u ha kaba iadei bad ka kam ak phlim.
Kum u tyngshop u Zac ula don bynta ha ka kam ak phlim la kumba 20 snem bad ula pynshoh jingieit ia kiba bun ki nongpeitkai da ki kam ba u trei bad ka jinglong tbit bad jinglong kynsai jong u.
U Zac un sa don kyrteng ha ka Hollywood Walk of Fame lem bad kiwei kiwei ki khlur ak phlim jong ka Hollywood bad manla u snem ka Hollywood ka ju jied ia ki khlur ak phlim kiba kynsai ban pynkup burom.
Ha ka jingpynkup burom ia u Zac un wan sakhi da ki katto katne ki khlur ak phlim ka Hollywood kiba kynthup ruh u Jeremy Allen Whi te bad Miles Teller bad kumjuh ruh u direktor jong ka phlim Iron Claw u Sean Durkin.
Ka Ana Martinez kaba dei ka nongpynmih jong ka Hollywood Walk of Fame ka la pynpaw ka jingsngewkmen bakhraw ban pynbna ia ka kyrteng u Zac kum u nongshah pynkup burom mynta u snem.
U Zac ula rung ak phlim ha u 2000 bad ula shim bynta ruh ha ki show kum ka ER bad Firefly. Hynrei
ula pawnam bad paw pyrthei ha ka kam ba u trei hadien ba ula shim bynta kum u Troy Bolton ha ka Disney Channel’s High School Musical.
Kum u tyngshop u Zac ula shim bynta ruh ha ki phlim ba itynnad kiba kynthup ruh ka Hairspray, 17 Again, Bad Neighbours bad ha kajuh ka por ka Iron Claw bad ngin sa iohi ruh ia u ha kiwei kiwei ki phlim thymmai ha u snem ban wan.
