Nongstoiñ, Nohprah 07
Ha ka miet jong ka 6 tarik mynta u bnai kata ha ka por kumba 8 baje eiei, ki pulit ka Anti Narcotic Task Force (ANTF) ki la ïoh ban kem noh ïa uwei u briew uba na shnong Mawlai halor ka jingsuba jur ba u dei u nongkhaïi drok.
Ïa une u briew la tip kyrteng kum u Bakordor Marshillong uba dei na Mawlai Nongkwar ha East Khasi Hills.
Katkum ka khubor na ki pulit la ong ba hadien ba ki la ïoh ïa ka jingtip kaba thikna ïa ka jingdon jong ki nongkhaïi drok hapoh ka sor Nongstoiñ, ki la pynlong ïa ka jingkhynra ha kaba ki la ïoh ban bat bad kem noh ïa utei u briew na kawei na ki jaka ha Upper New Nongstoiñ.
Shuh shuh la ong ba ha katei ka jingkhynra jong ki pulit, na ka met jong utei u briew la ïoh ban kurup noh kumba 4 gram u drok heroin, 43 tylli ki klong rit (vials), 2 tylli ki thyrnia, kawei ka Android Mobile Phone bad 1736 tyngka ka pisa.
