Shillong, Nohprah:
Ka long kaei-kaei ka bym ju da kham jia ba ki nongïalam na kawei ka seng saiñ pyrthei kin leit sha ka jingïalang jong kawei pat ka seng saiñ pyrthei.
Hynrei kum kane ka jia ha Meghalaya ha kaba uwei na ki nongïalam ka NPP u la leit sha ka jingïalang ha shlem treikam ka BJP ha nongbah Shillong ha ka Lah Sngi U Blei ka 4 tarik Nohprah, 2023.
Une u nongïalam ka NPP u dei u Bah John F Kharshiing uba la leit sha ka jingïalang kaba la pynlong da ka Kisan Morcha lane ka shnat treikam jong ka BJP Meghalaya kaba dei shaphang ki nongrep ha kaba u la ai jingkren ruh ha kane ka sngi kaba dei ka sngi jong ki nongrep ha Jylla lane ka Meghalaya Farmers’ Day.
Haba ai jingkren, u Bah John u la ong ba ka dei ka sien banyngkong ba un ai jingkren hapoh ka shlem treikam jong ka BJP Meghalaya ha kaba u la ai khublei ruh ïa ka BJP kaba la ïoh jingjop ha ka ilekshon MLA ha ki Jylla.
U Bah John u la pynpaw ka jingsngew burom ïa ka BJP State Kisan Morcha kaba la khot ïa u sha kane ka jingïalang ban rakhe ïa ka sngi burom ki nongrep kaba lai ha kaba ka Sorkar Meghalaya ka la pynbna ïa ka 4 tarik Nohprah, 2023 kum ka sngi jong ki nongrep ha Jylla.
Wat lada u Bah John u dei uba don bad ka seng saiñ pyrthei NPP, hynrei u la pynithuh ïalade kum u Adviser ka Meghalaya Land & Forest Owners Association (MLFOA).
U Bah John u la kren ruh shaphang ki jingeh kiba mih namar ka jingkylla ka suiñbneng kaba ktah ïa ka rep ka riang bad ka ktah beit-beit ïa ki nongrep naduh ka jingjaboh ka lyer kaba pynsniew ïa ki jingthung, ka jingthang pluh, ka khyndew bad ki tyllong um, ka jingjur slap kaba sait noh ïa ka khyndew, ka jingtwa bad jingshlei um, ka jingsyiad ka suiñbneng nalor kiwei kiwei ki jingeh kiba ktah ïa ka mariang.
U Bah John u kren ruh shaphang ka jingkhanglad ban shu bret ne pynsepei ïa ki jingbam da kaba pyrkhat bad kheiñ bha kumno ban thied ban pet ïa ki jingdonkam bad ban tyngkai ïa ki jingbam. U kren ruh shaphang ka jingdonkam ban pyllang ïa ka bam na ka bynta kito kiba kyrduh bad donkam eh ïa ki jingbam.
