Shillong, Nohprah 07
Ka jingïakren pynbeit pud hapdeng ka Meghalaya bad Assam, kan nym lah shuh ban long ha une u snem ba mynta, hynrei tat ha u bnai Kyllalyngkot jong u snem ban wan ne ka lah ruh ban long hadien jong ka ilekshon MP.
“Ba ngin ong ban ïakren ïa ka kam khappud jong ka Ri-Bhoi Regional Committee mynta u snem te, ngin nym lah shuh ban dang ïakynduh, namar lada lait ma ngi, na Assam kim lait bad lada lait na Assam, ma ngi nangne ngim lait,” la ong u Symbud Myntri Rangbah ka jylla u Bah Prestone Tynsong uba dei ruh u Chairman ka Ri-Bhoi Regional Committee haba kren sha ki lad pathai khubor.
“Mynta lajan sa ka jingleh kmen Khristmas, kumta baroh ki la ïabun kam. Ha ka jingshisha ngi la buh ban pynlong jingïalang hynrei na Assam kim shym la lait bad na ka liang jong ki, ki la ong lada long ban buh noh ha ka 21 ne 22 tarik mynta u bnai, hynrei kine ki sngi pat ngi nangne ngim lait, kumta ngi la pynbeit ba lada long kaba lah ban ïakynduh noh ha u snem thymmai,” la ong u Bah Prestone.
“Haba ngi la ïa pynbeit ban ïakynduh ha u snem thymmai kata ha u bnai Kyllalyngkot hynrei hangne ruh ka lah ban long ne ban nym long namar ka la don sa ka jingpynkhreh ïa ka ilekshon MP, kumta lada lah ban ïakynduh kan bha eh hynrei hap ban ap haduh ban da kut ka ilekshon,” u la ong.
Halor ka jingmih ki khubor ba ka don ka jingtrei jubor da ka Assam ban shna surok ha thaiñ khappud kum ha Bakhlapara, u Symbud Myntri Rangbah u la ong bad kren shai ba kam don satia kano-kano ka jingpyntrei jubor ïa ki surok ha khappud bad ka dei ka surok kaba la shna hadien ba la don ka jingïasngewthuh jingmut, ki trai jaka ruh ki la pdiang bad kam mut satia ban ong ba ka surok kan dei ka bynta ban phiah ïa u pud u sam, hynrei kan dei beit tang ka jingpynïasoh na Meghalaya sha Assam.
“Kam bha ban pynmih kum kine ki khubor, don kiba ong ba ka la don ka jingshah klun ei ka jaka ha khappud, hynrei lada ngi leit ban peit kam don kum kata,” la ong u Bah Prestone.
Haba kylli, u Bah Prestone u la ong, “Ngin nym pat lah ban ai ïa ka kaiphod katba ngim pat ïakynduh biang bad ban leit jngoh shwa sha kito ki shnong bad ruh tang hadien ka jingïakren ïasyllok bad ki paidbah, yn sa lah ban phah ïa ka kaiphod sha ka sorkar”.
Shuh shuh u Bah Prestone u la pyntip, “Ha ka jingïalang kaba la dep, ngi baroh arliang ngi la rai ba ha kaba nyngkong eh ngin shim ïakren beit thik tang ïa ka Deshdomria bad Nongwah Mawtamur. Ynda la dep ka jingïakren halor kine ar, ngin sa ïakren sa ïa ka Block-II”.
“Ngi kwah ba ka jingïakren kan long bad bteng noh ha u Kyllalyngkot bad ha kaba nga la ïakren ruh bad u Atul Bora, kumta haduh mynta ngim pat tip la ka lah ban long ne em namar kan shong ha ka jingïarai lang,” la ong u Bah Prestone.
