Nongpoh, Nohprah:
Ka Nongrim Byrni Presbyterian Secondary School ha ka Sngi Ba-ar ka la rakhe ïa u mawmer jong ka jingdap 25 snem ka jingshakri jong ka skul ban pynsaphriang ïa ka jingnang jingstad ha ka thaiñ Byrnihat naduh u snem ba la seng nyngkong ïa ka ha u snem 1998.
Ïa kane ka jingrakhe dap 25 snem lane kata ka Jubilee Rupa la plie da u MLA ka thaiñ, u Bah Sosthenes Sohtun ha ka jingdon ryngkat u Bah Vincent Nianglang, Joint Director ka School Education, Ri Bhoi District, u Bah Victor Rani, MDC ka thaiñ, ka Kong Batrity Pyngrope, Headmistress jong ka skul, u Rev PG Khongsdir, Bah Johny Syiem Rangbah Shnong Lum Nongrim, ki pastor, ki rangbah balang ka Balang Presbyterian bad kiwei kiwei ki ‘riew pawkhmat ka thaiñ.
Ha kane ka sngi, u Bah Vincent Nianglang u la pyllait paidbah ïa ka kot thup sah jingkynmaw lane ka Souvenir halor ka jingïaid lynti kaba 25 snem jong ka skul kaba la mad ruh bun ki jingeh hapdeng kane ka jingshakri ka jong ka ban ai ïa ka jingnang jingstad kaba paka sha ki khynnah pule ka thaiñ.
Khyndiat kum ban shu pyntip hangne, ïa ka skul Nongrim Byrni Presbyterian Secondary School, la seng ha u snem 1998 da ka Nongjri Umsning District lyngba ka Education Committee kaba la lamkhmat da u (L) Rev SR Nongrum. La sdang nyngkong ïa kane ka skul tang ha ka kyrdan Lower Primary ha ka jaka kaba la ai sngewbha da ka shnong Lumnongrim Byrnihat bad kat dang ïaid ki snem ki por, ki bor pynïaid kane ka skul hapdeng ki jingeh bad ki jingtynjuh kiba bun, ki la lah ban kyntiew kyrdan na kawei ka klas sha kawei pat ki kyrdan tad haduh ba kan poi ha ka Klas 10 kumba ka long mynta.
Kum shi bynta na ka jingrakhe, ki bor pynïaid ka skul kila ïoh ruh ban pynkup burom ïa ki ‘riew rangbah, ki nonghikai ba nyngkong, ki khynnah skul ba pass nyngkong eh kum ka dak jong ka jingsngewnguh halor u synñiang u bynhei ba ki la noh bad don bynta bad katei ka skul.
U Bah Sosthenes Sohtun ha ka jingkren, u la ai ka jingïaroh ïa ki bor pynïaid skul, ki nonghikai bad ïa baroh kiba la ïadon bynta ban len lade ban kyrshan bad pynïar ïa katei ka skul tad haduh ba ka lah ban long kumba ka long mynta ha ka kyrdan Secondary School ban ai ïa ka jingnang jingstad sha ki khynnah pule ka thaiñ Byrnihat.
Kum u nongmihkhmat, u Bah Sohtun u la pynpaw ruh ba u sngewthuh ba kam dei satia kaba suk ban pynïaid ïa ka skul ha kine ki 25 snem lynter, da kaba ong ba dei ka jingtrei shitom, ka jinglen lade bad ka jingïaineh ka jong ki nongpynïaid skul, ki nonghikai ba kane ka skul ka la nangkiew shaphrang ha baroh ki liang.
Kum shi bynta na ka jingrakhe, la lehkmen lyngba ka jingrwai, ka jingshad jong ki khynnah pule ka skul kiba la shim bynta shitrhem ban pynphuh pynphieng ïa ka jingdap 25 snem jong ka skul.
