Shillong, Nohprah 07
Ka President ka Ri, da ka jingai jingmut jong u Myntri Rangbahduh, ka la pdiang ïa ki shithi iehnoh kam jong lai ngut ki Myntri Sorkar Pdeng ha ka Sngi Palei.
Ki lai ngut ki Myntri Sorkar Pdeng kiba la hiar shuki ki kynthup ïa u Narendra Tomar, Myntri ka tnat ka rep ka riang, u Prahlad Singh Patel, Myntri Khynnah ka tnat Jal Shakti bad Food Processing Industries, bad ka Renuka Singh Sarutra, Myntri Khynnah ka tnat Tribal Affairs.
Ha kajuh ka por, ka President ka la pynkhamti ha u Arjun Munda, Myntri ka tnat Tribal Affairs, ba un peit lang ïa ka tnat ka rep ka riang.
Ka Shobha Karandlaje, Myntri Khynnah, kan peit lang ïa ka tnat Food Processing Industries katba u Rajeev Chandrasekhar, Myntri Khynnah, un peit lang ïa ka tnat Jal Shakti.
Nalorkata, ka Dr. Bharti Pravin Pawar, Myntri Khynnah, kan long ruh ka Myntri Khynnah ka tnat Tribal Affairs nalor ka tnat kaba ka la bat baroh shi katta.
Lah ban kdew ba u Tomar bad u Patel ki dei baroh shi katta ki MP Lok Sabha jong ka BJP. Ki la shah jied kum ki MLA ha ka ilekshon sha ka Ïingdorbar Thawaiñ ka jylla Madhya Pradesh kaba la long dang shen katba ka Renuka Singh Sarutra ka la shah jied kum ka MLA ha Chhattisgarh.
Nalor kine, ki la don ruh sa kiwei pat ki MP ka BJP kiba la shah jied kum ki MLA ha ki ilekshon kiba dang shu dep shen bad ma ki ruh, ki la iehnoh ïa ka jinglong dkhot ka Lok Sabha.
