Shillong, Nohprah 07
Kum shi bynta ban tip bad sngewthuh ïa ka rukom treikam ka projek pynmih bording, u Myntri ba khmih ïa ka tnat Bording ka Jylla u Abu Taher Mondal ha ka Sngi Palei u la hiar sha ka Pump Storage Programme ha Puralia (PPSP), West Bengal ban jngoh ïa ka rukom long bad treikam kane ka projek pynmih bording ba 4×225 MW ba la plie naduh u 2007.
Ha kane ka jingleit jong u Myntri, la synran da u Commissioner & Secretary ka tnat bording ka Jylla u Sanjay Goyal ryngkat ka jingïadon lang u Subhasankar Debsarma Biswas, Director (Generation) ka West Bengal State Electricity Distributor Company Limited (WBSEDEL) uba la ai ka jingbatai kaba bniah ha kaba ïadei bad ka rukom treikam jong ka projek.
Ka jingleit jngoh jong u Myntri ïa katei ka projek bording ha West Bengal ka long ban peit thuh ïa ka rukom treikam jong ka bad ban lah pyntreikam lang ha Jylla khnang ban tem ïa ka jingeh jong ka Jylla ha ka jingduna bording.
U Mondal u la ong, “Ka jingleit jngoh ïa ka Purulia Pump Storage Project (PPSP) ka dei kaba ai shibun ki jingnang jingtip. Kane ka dei ka pump storage projek ba nyngkong eh ha India kaba pynmih haduh 900MW. Haba khmih ïa ka jingdawa bording hapoh ka Jylla jong ngi, ngi thrang ban wad ïa ki lad ki lynti ban lah pynkhlaiñ ïa ki jingtei kiban pynmih bording hapoh ka Jylla”.
