Shillong, Nohprah 07
Ka jingïalang hapdeng ki arliang mamla kata hapdeng ka Sorkar Jylla bad ka Harijan Panchayat Committee (HPC) kaba la long ha janmiet sngi palei ka la poi sha ka jingïahun ban pynkynriah noh ïa kiba sah ha Them Metor sha kawei pat ka jaka kaba la don lypa ha kaba ka Sorkar kan ai jaka shuh sa 1.4 akar kaba don marjan bad ka shlem treikam ka Shillong Municipal Board (SMB) kaba mynta khnang ban ngiam ban tei ïa ki ïing na ka bynta ki 342 tylli ki longïing.
Kane ka jinghun lang ka HPC ban pynkynriah ïa kiba sah ha Them Metor ka dei ha ka jingïalang jong ka High Level Committee (HLC) ha Secretariat kaba la pynïaid da u Symbud Myntri Rangbah u Bah Prestone Tynsong uba dei ruh u Chairman ka HLC jong ka Sorkar Jylla ha ka jingïadonlang u Symbud Myntri u Bah Sniawbhalang Dhar uba peit ïa ka tnat pynroi sor nalor ki nongïalam ka Harijan Panchayat Committee (HPC) lem bad ki dkhot ka Gurudwara Committee kiba wan na Delhi.
Haba kren sha ki lad pathai khubor hadien ka jingïalang, u Bah Prestone u la ïathuh ba ka jingïalang ka la long kaba seisoh bad hun haba ïadei bad ka jingpynkynriah ïa kiba sah ha Them Metor sha ka jaka kaba don lypa kumba 2.14 akar kaba don ka shlem treikam ka Shillong Municipal Board mynta.
U Bah Prestone u la ong ba nalor ka jaka kaba la don lypa kumba 2.14 akar, la pynbeit ban ai jaka shuh sa 1.4 akar marjan bad kane hi ka jaka ba don ka shlem treikam ka SMB na ka bynta ban ngiam lut baroh 342 tylli ki longïing kiba don ha Them Metor.
Kumta u Bah Prestone u la ong ba ki dang don shuh sa katto katne ki bynta kiba ka Harijan Panchayat Committee kan leit ïakren bad kiba sah ha Them Metor ha kaba la pan por sa katto katne taïew bad yn sa shong biang sa kawei ka jingïalang ka ban sa long ha u snem thymmai kata ha u Kyllalyngkot, 2024.
U Bah Prestone u la bynrap ba kumba la mynjur lang, ka jingpynkynriah ïa kiba sah ha Them Metor kan ïaid beit bad kane ka dei ka mat kaba ka Sorkar ruh ka la kren naduh ka sngi kaba nyngkong bad ka Sorkar ka ïeng beit ha kata ka nongrim.
U Bah Prestone u la ong ba ha katei ka jingïalang ka ban sa long u ngeit skhem ba yn sa lah ban pyndep noh ïa ki bynta kiba dang sahteng.
Hynrei um pat ïathuh ïa kiwei pat ki mat kiba dang donkam ban ïakren namarba ka HPC kan dang ïakren para maki bad kin sa ïakynduh lang biang ha u Kyllalyngkot 2024.
