Shillong, Nohprah 07
U MLA ka North Shillong Konstitwensi, u Bah Adelbert Nongrum u la ong ba ka sorkar ka hap ban shim ïa ka jingkitkhlieh halor ka jingbuh ïa ki jingker nar lane ki ‘barricade’ ha Them Ïewmawlong kaba la pakhang lynti ïa ki paidbah ban ïaid ban ïeng ha kaba lyngba katei ka jingker nar ha katei ka jaka ka la wanrah ruh ïa ka jingdheng kali kaba jur ha kitei ki thaiñ.
Haba kren sha ki lad pathai khubor ha ka Sngi Palei ha kaba ïadei bad katei, na ka liang u Bah Adelbert u la kyntu ïa ka sorkar jylla ban weng noh shisyndon ïa ka jingker nar kaba don hajan Bimola khnang ba yn lah ban weng ïa ka jingdheng kali ha ka thaiñ Motphran bad ter ter shaduh ki jaka kiba long Ïew.
“Nga kwah ban buh ka jingkylli ïa ka sorkar ba la hato ka sorkar ka dei jong ki paidbah ne ka dei ka sorkar jong ki katto katne ki kynhun?”, la buh jingkylli u Bah Adelbert.
U Bah Adelbert u la ong ba ka sorkar ka dei ban pynkynriah ïa kitei ki briew napoh Them Ïewmawlong sha ki jaka ba ka la thmu ban buh ïa ki.
U Bah Adelbert u la ban jur ruh halor ka jingpulom jong ka sorkar naduh ka sorkar MDA-1 haduh ka sorkar MDA-2 kiba long kijuh ha kaba ïa ki kam baroh la hap ban tuklar beit da ka ïingkashari na ka bynta ki mat bapher bapher kiba don hapoh ka jylla.
U Bah Adelbert u la ong ruh ba lada ka sorkar kam lah ban weng ïa katei ka jingker nar kaba don hapoh Them Ïewmawlong, ka dei ban pynshai paidbah lyngba ki sakhi la hato katei ka jaka lane ka jingker ka dei jong kawei pat ka Jaitbynriew ne ka dei jong ka jylla baroh kawei.
“Kane ka pynpaw ïa ka jingtlot jong ka sorkar, nga sngew ba ka sorkar ka dei ban weng noh mardor ïa kitei ki jingker nar ha Them Ïewmawlong khnang ba kan don ka jingshongsuk shongsaiñ bad ka sorkar ka hap ban pynshai ba ka dei jong kawei ka Jaitbynriew ne ka sorkar jong ki nongshong shnong jong ka jylla baroh kawei”, la pynkut u Bah Adelbert
