Shillong, Nohprah 07
Ka jingangnud ka Sorkar Jylla ban pynkylluid ïa ka nongbah Shillong lyngba ka jingshna shuh shuh ïa ki surok kiba kylluid ka lah ban pulom noh tang na ka daw ka jingrem ka bai jaka khamtam haba ïadei bad ka surok Western Bypass.
Kane ka la paw lyngba ka jingrem ka bai shim jaka ban shna ïa ka Western Bypass kaba 38 km na Umïam sha Mawmaram.
Haba ïakren bad u Symbud Myntri Rangbah u Bah Prestone Tynsong u la ong ba ka Tnat shna surok ka Sorkar Pdeng (Ministry of Road Transport and Highways) ka la mang kumba T.600 klur ban shna ïa ka Western Bypass kaba jrong kumba 38km.
Hynrei u Bah Prestone u la ong ba ka jingeh kaba mih mynta ka dei ka jingshim jaka ban shna ïa kane ka surok.
U la ong ba jingshim jaka ka la rem bha namarba ka MoRTH jong ka Sorkar Pdeng ka la buh jingkylli kumno ka kham rem ka bai shim jaka ban ïa ka jingmang pisa ban shna ïa ka surok.
“Ngi la bthah ïa ki Deputy Commissioner ka Ri-Bhoi bad East Khasi Hills district ban peit biang bad ai jingkheiñ haba ïadei bad ka jingshim jaka namarba kam lah ban long ba ka bai shim jaka kan kham heh ban ïa ka jingmang pisa ban shna ïa ka surok. Lada ngi bakla, ngi lah ban duh ïa kane ka projek tang na ka daw ka jingbym ïahap shuh ka tnat MoRTH ïa ka bai shim jaka,” la ong u Symbud Myntri Rangbah.
U la ong ba na ka liang u Myntri ka Sorkar Pdeng uba peit ïa ka MoRTH u Nitin Gadkari u la dep kren shai ba lada ka long kumne kan buh jingeh ha ka rukom ai jingkheiñ namarba ka bai jaka ka kham heh ban ïa ka jingmang pisa na ka bynta ban shna ïa ka Western Bypass.
Ka Western Bypass ka dei ka projek kaba ka Sorkar Jylla ka la trei shitom ban ïoh ïa ka jingmang pisa lyngba ka NHIDCL jong ka Sorkar Pdeng. Kane ka surok ka dei kaba kongsan tam namar kan rung na Umsaw Khwan ha Umïam khlem da ïaid lyngba ka nongbah Shillong bad kan long ka jingïarap kaba khraw ban weng ïa ka dheng kali ha nongbah Shillong.
