Shillong, Nohprah 07
Ka Central Executive Committee (CEC) jong ka Khasi Student’s Union (KSU) ha ka Sngi Palei ka 7 tarik Nohprah 2023 ka la kynmaw burom ïa ka lyngkhuh sngi ïap kaba 29 snem jong u (L) Bah Bull N Lyngdoh uba dei u President barim jong ka KSU da kaba leit buh syntiew ha u mot dur jong utei u nongïalam uba don ha Malki.
U Bah Bull u dei u President ba saw jong ka KSU bad uba la shimti ïa ka kam President jong ka seng ha u snem 1983 haduh u snem 1990.
Ha katei ka sngi kynmaw burom ïa une u nongïalam ka KSU, la don ryngkat lang ruh da ka para trai jong u Bah Bah Bull, ka Kong Hana Lyngdoh bad la pynlong ruh ka jingbuh syntiew na ka ïing ka sem jong u, nangta bud sa ka jingbuh syntiew na ki nongïalam ka KSU, ki Unit bad ki Circle bapher bapher ha utei u mot dur.
Haba ai jingkren ha katei ka jingïalang kynmaw burom, u General Secretary ka KSU, u samla Donald V. Thabah, u la ong ba ka jinglen lade, ka jingaiti bad nam jong u Bah Bull Lyngdoh kam kut tang ha u pud u sam jong ka bri u Hynñiewtrep hynrei baroh ka thaiñ shatei lam mihngi ka ri, ki ithuh bad kwah ban long kum u Bah Bull N. Lyngdoh.
U samla Thabah u la ong ba kiba bun ki bym dei na ka jaitbynriew, ki la kynthoh laiphew jait laiphew rukom bad ki la kynnoh ym tang ïa u Bah Bull hynrei ki la kynthoh ruh ïa baroh ki nongïalam bad ki dkhot jong ka KSU ba ki la leh donbor bad sngew ïapher jaitbynriew hynrei kum ki trai ri trai muluk kiba don hangne ha la ka jong ka khyndew ka shyiap, ki tip bha kaei ba ka seng ka leh bad kaei ba u Bah Bull u leh.
“Kaba sngewsih ka long ba ym dei tang ki bym dei Khasi kiba kynthoh ïa ki nongïalam jong ka KSU bad ïa ka KSU hi baroh kawei hynrei nalor ki nongshun jong ka Jaitbynriew, ki don ki kruiñ jong ka Jaitbynriew kiba la long kita ki nonglilam jong ka Jaitbynriew kiba la pyndonkam ïa ka jinglong jong ka Jaitbynriew jong ngi ban bishni bad ban wohdong bad peit matdong iwei ïa iwei da kaba shna ïa ki khana lamler ban kynnoh laiphew jait laiphew rukom ïa ki nongïalam jong ka KSU”, la ong u Bah Thabah.
U Bah Thabah u la ong ba ka KSU ka la shakri ïa ka Jaitbynriew la 45 snem hynrei kam pat ju don ha kano kano ka khep jong ki 45 snem ba kan shet kylla lane kynran dien na ka bynta ka dawbah jong ka ri bad ka Jaitbynriew.
“Lada dei ba ka KSU ka long kumta mynshwa, lada dei ba u Bah Bull, u Bah Michael, u Bah Banshan, u Bah Samuel, u Bah Daniel ki bakla mynshwa, ka mut ka KSU ka la duhjait hi naduh mynno”, la ong u Bah Thabah.
Shuh shuh u Bah Thabah u la pynkynmaw ruh ïa ki sngi bad ki snem kiba u Bah Bull u la shakri bad ïaleh na ka bynta ka dawbah jong ka Jaitbynriew ha kaba u la khlad noh na ka sla pyrthei ha ka rta kaba 42 snem. Ha shwa ba un khlad, ka jingim jong u ka la long kaba sohsat bha namar ha ka por ba don ka jingïakhih pyrshah ïa ki Nepali ha u snem 1987 bad ka jingïakhih pyrshah ïa ka jingwanrah ïa ka lynti rel hapoh ka jylla ha u snem 1989, u Bah Bull N. Lyngdoh u la shah pynshitom bad u la shah bom shah tied ha ki bor ka aiñ haduh ba ka met jong u ka la khrew bad shitom kaba la pynlong ba un im ïa ka jingim kaba jynjar hynrei um sngeweiei namar katei ka jingleh jong utei u nongïalam ka la wanrah ka jingshngaiñ ïa ka ri bad ka Jaitbynriew.
U la pynkynmaw ruh ba kiba bun ki shong bad ki dong jong ki Khasi ki la dei ban kylla long ki shong jong ki Nepali kum ka Mawlai, Mawprem, Nongmensong hynrei dei lyngba ka jingïakhun jong u Bah Bull ba la pynlong ïa ki mynder ri ba kin phet krad napoh ka bri u Hynñiewtrep.
U Bah Thabah u la ong ba kam pher lada ka sorkar kam ithuh ïa une u rangbah nongïalam u ba la shakri ïa ka ri bad ka Jaitbynriew hynrei lada u paidbah bad ki paradoh parasnam baroh ki ithuh bad kynmaw ïa kum kitei ki nongïalam, ka mut ba ka Jaitbynriew kam dei kaba ïap hynrei ka dei kaba im bad kaba ïakhun ïa ki jingïaleh.
