Nongstoiñ, Nohprah:
Ka District Disaster Management Authority (DDMA) ha ka Sngi Ba-ar ka la sdang ïa ka jingïalang ai jinghikai kaba lai sngi lynter halor kumno ban pynkhlaiñ ïa ki kynhun jong ki Block Disaster Management ha ryngkat ka jingpynkhreh ïa ki plan jong ka.
Ïa katei ka jingïalang la pynlong ha TRYSEM Hall jong ka shlem treikam u DC Nongstoiñ ha kaba u Bah HK Thabah ADM bad uba dei ruh u CEO ka DDMA West Khasi Hills District u la ïoh ban plie ïa ka jingïalang kum u kongsan.
Ha katei ka jingai jinghikai la wan ban ïashim bynta da ki block coordinator, ki gramsevak na Nongstoiñ bad Mawshynrut bad kumjuh ka kynhun jong ki Fire & Emergency, Homeguard & Civil Defence ha ryngkat ka jingïadonlang u Bah J Mawthoh, Nodal Officer DDMA, u Bah W Nonglang, Deputy Controller Civil Defence & Homeguard bad kiwei kiwei.
U Bah HK Thabah haba kren kum u kongsan ha ka jingïalang u la ban jur halor ka jingdonkam ban ïai long kiba la pynkhreh na ka bynta ban ïada lada wan lynshop ki bor mariang khamtam ka jingkhih jumai da kaba u la ong ruh ba dang ha kine ki khyndiat sngi bala lah kala don ka jingkhynñiuh u jumai.
Kumta u la kyntu ïa baroh kiba wan sha ka jingïalang shah hikai ba ki dei ban ïashim bynta khah khah ha kiba kum kitei ki jait jingshah hikai namar ki jinghikai kiba ki ïoh na katei ka jingïalang kan ai jingmyntoi ym tang ïa ki hynrei na ka bynta ka imlang ka sahlang hi baroh kawei.
Shuh shuh ha katei ka sngi u Bah P Marbaniang, uba la wan na MATI, Shillong u la shim ka bynta ban pynshai ïa ki jingdonkam ha kaba ïadei bad ki phang kiba donkam ban leh bad ïadei haba wan jia ka jingshah lynshop ha ki bor mariang.
