Mumbai:
Kawei na ki puron ka Bollywood ka Rani Mukherji ha ka jingwan shim bynta ha ka show u Karan Johar ka Koffee With Karan ka la kren halor ka jingangnud jong ka ban ak phlim wat ynda ka la don haduh 80 snem ha kaba kane ka puron ka la iathuh ba katba ka dang sngew lah ha ka met ka phad kan ym shongthait da lei lei ruh na kane ka kam.
Ka Rani ka sngew ba ka por ka la iaid ha kaba bun ki puron wat ynda haba ki la noh ha ka rta bad kiba dang lah ban ak phlim ki iai bteng beit ia kane ka kam jong ki.
Ka Rani kam kwah ba tang namar ka jingiaid ka rta kan kiar ne iehnoh syndon ia kane ka kam bad ong ba ka kwah ban ai mynsiem lem ia kiwei kiwei ba katba ka met ka dang ailad iai bteng beit ban leh ha kaei kaba phi kwah ne thmu.
Ka Rani kaba dang shu dep ak ha ka Mrs Chatterjee vs Norway ka sngew ba ym dei ban don ka jing sngew sheptieng ban ak phlim tang shu la kham rangbah ha ka rta ha kaba haba don ka mon dei ban leit beit ia kaei kaba ngi sngewtynnad.
Ka Rani ka la rung ak phlim naduh ba ka la don 27 snem bad ka la shim bynta ruh ha ka Kuch Kuch Hota Hai kawei na ki phlim ba itynnad bha bad kumjuh ruh ha ka Kabhi Alvida Naa Kehna.
Ha ka jingsngew ba shimet jong ka Rani ka jingiai bteng jong ka ban ak phlim na uwei u snem sha uwei pat ka dei namar ka jingieit ba ka ioh na ki nongkyrshan. Ka jingiaid lynti jong ka Rani ha Bollywood ka dei kaba biang bha ha kaba ka la mad ruh ia ka jingshah iaroh halor ka jingitynnad ki katto katne ki phlim ba ka shim bynta bad ha kajuh ka por ka la mad ruh ia ka jingduhnong.
Kane ka puron ha u snem ban wan kan sa ak ruh ha ka bynta bathymmai jong ka Mardaani bad kumjuh ruh ha kiwei kiwei de ki phlim bad kum ka puron ka la ioh ban rah bun ki khusnam halor ki phlim ba ka ak.
