Shillong, Nohprah 07
U President ka Hynñiewtrep Youths’ Council (HYC) West Khasi Hills District u Bah Lumlang Kharsyiemlieh u la ong ba ha ka jingpynbeit pud kaba arsien (second phase) hapdeng ka sorkar Meghalaya bad Assam ka seng kam shah ba kawei ka tnum ïing Khasi kan leit sha Assam hynrei kin sah beit ha Meghalaya.
Haba ïakren bad u Bah Lumlang u la ïathuh ba ka Regional Com-mittee West Khasi Hills hapoh ka jinglong Chairman u Bah Paul Lyngdoh uba dei u Myntri ka Sorkar Jylla u la dep khot arsien ïa ka jingïalang ban ïakren shaphang u pud u sam.
U la ïathuh ba ha ka Langpih Sector ki don 53 tylli ki shnong Khasi kiba don markhap bad ka Assam kaba ju mih jingïakynad. Kumta ka seng ka la dawa jur na ka Sorkar Jylla ba ki shnong Khasi baroh kin hap sha Meghalaya.
“Ngim kwah shuh ban jia kum ha ka jingpynbeit pud kaba nyngkong ba palat 12 tylli ki shnong kiba sah ki Garo kin leit sha Assam kiba dei ha ki thaiñ Ahim” u la ong.
U la ïathuh ba ka seng ka dawa biang na ka Sorkar Jylla ba kan ïakren biang bad ka Sorkar Assam ba kan pynphai biang ïa ki 12 tylli ki shnong kiba la dep ngat sha Assam namar kito ki shnong ki dei kiba hap ha Meghalaya.
U Bah Lumlang u la ïathuh ba ki shnong kiba don syndah bad ka Assam ki long Langpih, Mawsikar, Umwali, Mawdiangsnam, Umyïap, Pyndensohstap, Ïewnongma, Nongbri Nongmawleiñ, Pambari, Nongsohram.
Katba ki shnong kiba shong khleh hapdeng ki Khasi bad Nepali ki long ka Umbyrsit, Mawsikar Lawbah, Umwahsniang, Makaibari.
“Ngim pat tip lano ka Regional Committee kan sa khot biang hynrei ngi la kren shai ba lada ki shnong Khasi kin hap sha Assam ngin hap ban ïaumsnam beit” u la ong biang.
Shuh shuh u Bah Lumlang u la pynpaw ka jingsngewkmen ba ha kane ka jingpynbeit pud kaba arsien ka sorkar ka la khot jingïalang ïa ki rangbah shnong, ki nongïalam hima, ki sengbhalang bad ki ‘riew rangbah ban ai jingmut.
U la ïathuh ba ka jingduh ïa ki 12 tylli ki shnong ha ka jingpynbeit pud kaba nyngkong ka dei namar ka sorkar ka khlem khot ïa ki rangbah shnong, ki sengbhalang.
Ha kajuh ka por u don jingkyrmen ba ka sorkar Meghalaya kan ïakhun beit ba ki shnong Khasi ha Langpih kin hap beit sha Meghalaya.
