Shillong, Nohprah 07
Ka Meghalayan Medical Drugs & Services Limited ha ka Sngi Palei ka la pynshai ba u dawai kuli Albendazole um don jingma eiei lada pyndonkam ïa u.
Ha u kyrwoh khubor, u Managing Director ka MMDS Limited, u Ram Kumar S, u la ong ba ïa u dawai Albendazole (Batch no. MS4AI2301 ba la pynmih ha u Kyllalyngkot 2023, bad u ban kut tarik ha u Nohprah 2025) la ïoh pdiang da ka jylla, bad la sam sha ki distrik.
U Ram Kumar u la ïathuh ba la leh ïa ka jingpeit bniah ïa une u dawai ha u bnai Rymphang 2023 bad la peit lang ruh ïa ka kaiphod ba la ai da u nongpynmih ïa u dawai bad ka kaiphod na ka National Accreditation Board for Testing and Calibration Laboratories (NABL). Kine ki artylli ki kaiphod ki pyni ba utei u dawai u long uba bit ba biang bad uba ïahap bad ki kyndon ba la buh.
Hynrei, u Ram Kumar u la ong hadien ba la ïoh ïa ka kaiphod na ka Regional Drug Testing Lab (RDTL), Assam, ha u Risaw 2023 ha kaba la kdew ba utei u dawai kuli um long satia uba biang bad um dei uba long katkum ki kyndon, la ai jingbthah ban pynsangeh noh ïa ka jingsam ïa utei u dawai.
Hadien kata, u Ram Kumar u la ong ba la leh ïa ka jingpeit bniah ba sani bha lane kata ka “Comprehensive Quality Reassessment” ha u Naiwieng 2023 da ka Quality Control Division jong ka Meghalayan Medical Drugs & Services Ltd. bad la shim ïa ki dawai kuli bad phah sha ka shlem peit bniah kaba la pynïasoh bad ka NABL ha Kolkata.
Ha ka por ba la phah peit ïa kine ki dawai sha Kolkata, la buhrieh noh ïa ka kyrteng jong u nongshna ïa u dawai bad ïa ka Batch Number. Na ka kaiphod ba la ïoh halor kitei ki dawai kuli Albendazole (Batch no. MS4AI2301 ba la pynmih ha u Kyllalyngkot 2023, bad u ban kut ka por ha u Nohprah 2025), la pyni ba ki long kiba bit ba biang bad kiba ïahap bad ki kyndon.
Nalor jong kitei ki jingpeit bniah, u Ram Kumar u la ïathuh ba haduh mynta ym pat shym don kano-kano ka ban pyni ba ka don ka jingktah haba la dep ban dih ïa utei u dawai kuli.
U la ong ruh ba ka sorkar ka shimkhia ha kaba ïadei bad ki dawai khnang ba kin long kiba bit ba biang ban pyndonkam.
