Shillong, Nohprah 07
Ka Khun Hynñiewtrep National Awakening Movement (KHNAM) ka la ong ba ka Sorkar ka dei ban pyntip paidbah kiei kita ki 342 ngut bad ki trei haei ba kin ïoh ban sah ynda la pynkynriah na Them Metor.
U Working President ka KHNAM, u Bah Thomas Passah u la ong ba ka jingïaid lynti ka kam ban pynkynriah ïa ki Harijan na Them Ïew Mawlong sha ka jaka lane ki quarter ba thymmai ka la ïaid sha ki 6 snem, bad kumba paw hi la ïohi kumba ka Harijan Panchayat Committee (HPC) ka la shim kabu ban myntoi katba lah na kane ka jingïakren.
U la ong ba ka Sorkar ka la rai ban ai haduh 3.6 akar ka jaka sha ki hynrei ka jingkylli kaba mih ka long kane ka jingai jaka kam pynkheiñ mo ïa ka Land Transfer Act jong ka Jylla. “Na kata ka daw kum ki paidbah ngi dei ban ïoh jingshai na ka sorkar ba kane ka jaka 3.6 akar kan dei noh jong ki ne kan dang dei jong ka Sorkar khnang ban ïa shai bha. Lada kane ka jaka ym ai noh sha ki kamut ba ka Sorkar hi ka pynkheiñ ïa ka aiñ lajong,” la ong u Bah Thomas.
Katkum ka ‘inventory report’ ba ka pynkhreh da ka SMB la batai ba kiba trei lane kita kiba dei ki nongtrei ka SMB ki don 184 longïing bad kiwei ki dei kiba sah beaiñ. “Ka jingkylli kaba mih ka long ba mynta pat la batai da ka Sorkar ba ki don haduh 342 longïing kiba hap ban ai jaka bad wat ban pynshna ïing ei ïa ki ruh da ka pisa paidbah,” u la ong.
Kumta u Bah Thomas u la ong ba ka Sorkar ka dei ban pyntip paidbah kiei kita ki 342 ngut bad ki trei haei, namar ban ai jaka pat ïa kiba shu shong beaiñ kan ïalam sha ka jingmlien kaba bakla.
