Shillong, Nohprah 07
Ka Sorkar Jylla ka la rai ban pyllait ïa ka Jaiñtia Hills Autonomous District Council (JHADC) na ka jinghiran pisa ban siew tulop sha ki nongtrei ka council kaba phra bnai bad kot sha ka T.50 klur.
“Ngi dang ïa pyrkhat kumno ban pyllait ïa ka JHADC na kane ka jinghiran pisa kaba shipor, kaba la lam shaduh ka T.50 klur ka jingsiew kaba sah sha ki nongtrei jong ka council,” la ong u Symbud Myntri Rangbah ka jylla u Bah Prestone Tynsong uba khmih ruh ïa ka tnat District Council Affairs (DCA) haba kren sha ki lad pathai khubor.
“Hynrei haba nga ong ban pyllait ïa ki, ka lah ban long ba ngin pynbit pynbiang na ka bhah kaba ju ai sha baroh ki lai tylli ki Autonomous District Council, kata ka KHADC, JHADC bad GHADC,” u la ong bad bynrap “Mynta ka tnat pla tyngka (finance) ka dang trei naba ngi kwah ban pyllait ïa ka JHADC.”
Haba kylli, u Bah Prestone u la ong, “Ym tang ka tnat pla tyngka, kiwei ruh ki tnat kum ka mining and geology, forest bad wat ka transport ruh ki dang trei bad wad ki lad ki lynti ban pynbit pynbiang ha kaba ïadei bad ka bhah kaba ju ïoh da ka KHADC, JHADC bad GHADC bad shisien ba kane ka la dep, ngin sa pyllait katto katne ka pisa sha ki ADC.”
Lah ban pynkynmaw ba dang shen u CEM ka JHADC u Bah Thombor Shiwat u la ong ba ka Executive Committee ka jong u ka dang ïaleh katba lah ban wad ki lad ki lynti ban pynkhuid noh ïa ka pisa kaba sah.
Katkum ka jingïathuh ka jong u, ka jingsiew tulop ha ka shi bnai ba kynthup ruh ïa ka baibam kiba la shongthait ka poi kumba T.6 klur eiei.
“Lada ka sorkar kan ai ïa ngi T.50 klur, ngin sa lah ban pynkhuid lut ïa ka tulop baroh kaba sah jong ki nongtrei,” la ong u CEM.
