Nongpoh, Nohprah:
Kumba long lem ha baroh shityllup ka pyrthei, ka shlem treikam u Block Mission Co-ordinator, SSA-SEMAM Umling BRC ryngkat ka jingïatreilang bad ka HANS Foundation ha ka Sngi Ba-ar ka la pynlong ïa ka jingrakhe ïa ka sngi ba kyrpang jong ki briew kiba don jingduna dkhot met kaba la tip kum ka International Day of Person with Disabilities.
Ïa kane ka jingrakhe la pynlong ha ïingdorbar jong ka shnong Nongpoh ha Sajer, ha kaba u MLA ka Nongpoh, Bah Mayralborn Syiem u la don lang kum u kongsan lem u Raja Brahma, Project Director ka District Rural Development Agency (DRDA), ka Jurimita Puzari, Project Manager ka HANS Foundation, ka Lalchandami Marak, JRDO ka Umling C&RD Block, u PP Yadav, BMC ka Umling BRC bad kiwei kiwei ki ‘riew rangbah nalor ki kmie ki kpa lem bad ki khun jong ki, kiba don jingduna ha ki dkhot met bapher bapher.
Ha kane ka sngi, la pynlong ruh ïa ki jingïalehkai bapher bapher kiba la shim bynta da ki khynnah kiba don jingduna ha ki dkhot met bad ruh ïa ka jingsumar ei lane kata ka Medical Check-Up hapoh ka jingkhmih jong ka HANS Foundation.
U Bah Mayralborn Syiem haba kren ha kane ka sngi, u la ai ka jingïaroh ïa ka shlem treikam u BMC ka SSA-SEMAM ka Umling BRC kaba la lah ban pynlong ïa kane ka prokram kaba kyrpang ban kynmaw burom bad rakhe ïa ka sngi ba kyrpang ki briew ba don jinduna ha ki dkhot met, da kaba ong ba kine ruh ki don ïa ka hok ban im kumjuh kumba long lem kiwei kiba biang lut nadong shadong ha ka imlang ka sahlang.
U la pynpaw ruh ba u dap da ka jingsngew myllung ban ïohi ba ki khynnah wat hadpeng ka jingduna ha ki dkhot met, hynrei ki don pat ïa ka sap kaba kyrpang kaba U Blei u la ai bynta ha ki bad kyntu ïa ki paidbah ha ka imlang ka sahlang, ba kim dei satia ban ñiew beiñ lane peit shilliang khmat ïa ki, hynrei ba kin burom bad ai ba kin im kumba long lem kiwei ha ka imlang ka sahlang, ha ka shnong ka thaw.
Shuh shuh u Bah Mayralborn u la pynpaw ruh ba na ka liang ka jong u, um shym la shong kli kti, hynrei u dang ïaleh katba kot la ka bor ban wanrah ïa ki jaka pule ba kyrpang na ka bynta ki briew kiba don jingduna ha ki dkhot met kiba u la ong kum ki briew ba kyrpang, kiba donkam ïa ka jinghikai bad ka jingshakri kaba kham kyrpang haba nujor na kiwei pat ki bit ba biang ha ki dkhot met.
