Los Angeles:
Ka Angelina Jolie ka la don jingthmu ban mih noh na Los Angeles ha kaba kane ka puron ka sngew ba ka Hollywood kam dei satia ka jaka kaba biang na ka bynta jong ka bad ki khun ki kti ban shong ban sah. Ka Jolie ha kawei na ki interview ka la kren bad pynpaw ha kaba iadei bad kane bad sngew ba ka donkam ban wad ia ki jaka kiba biang ba kan pynheh pynsan ia ki khun ki kti bad kiba lait ruh na shibun kiei kiei kiba sniew.
Ka Jolie ka la dep ban kren teng halor ka jingkwah jong ka ban mih noh na LA bad ban jngai noh na Hollywood bad sngew ba ka jingdon bynta bad ka Hollywood ka la ktah shisha ia ka jingim jong ka bad ha kajuh ka por ka la shah ban khia ha ki jingmut jingpyrkhat.
Kane ka puron kaba la dep ban iohpdiang teng ia ka Oscars ka sngew ba mynta ka donkam ban wad da kawei pat ka kam ban trei bad ban kiar noh na Hollywood bad ha kajuh ka por ka sngewthuh ruh ba ka LA ka dei ka jaka ka bym long na ka bynta ki khun ki kti jong ka.
Ha kawei na ki interview ka Jolie ka la pynpaw ba mynta ka kam ak phlim kam shim lah shuh ban khring ia ka bad kam don mon shuh ban trei ia kane ka kam.
Hadien ka jingdkut noh ka jingkyntiew kurim bad u Brad Pitt ka Jolie ka sngewthuh shai ba ka Hollywood kam long shuh ka jaka na ka bynta jong ka bad ka la pyrshang ban kiar na ka kam ak phlim naduh kine ki snem ba la leit.
Kane ka puron ka thrang eh ban pynheh pynsan ia ki khun ki kti ha ki jaka kiba lait na ka jingshah buddien ki nongshondur bad lad pathai khubor bad nalor kane kwah ruh ia ki khun ba kin im laitluid ka jingim kumba long kiwei kiwei ki khynnah.
Naduh u 2018 ka Jolie ka la shim bynta tang ha ki ar tylli ki phlim ha kaba kawei ka dei ka Maleficent: Mistress of Evil bad kawei pat ka Those Who Wish Me Dead. Dang ha kine ki khyndiat bnai ka dang shu dep ruh ban ak ha ka phlim Pablo Larrain’s Maria, kaba dei halor kawei na ki nongrwai Opera ba pawnam bha ka Maria Callas.
