Shillong, Nohprah 07
U MLA ka North Shillong Konstitwensi, u Bah Adelbert Nongrum ha ka Sngi Palei ha ryngkat ka jingsynranlang ki nongmihkhmat na ki Dorbar Shnong bapher bapher kiba hap hapoh u pud u sam jong katei ka konstitwensi ki la leit ban hiar jurip halor ka jingkhapngiah jong ki surok khamtam ha ki bynta jong ka thaiñ Motphran kaba la wanrah ïa ka jingdheng kali kaba jur.
Ha katei ka jingleit jurip halor ka jingdheng kali ha kitei ki bynta ka Motphran, la shim da ka rai ban ym shah shuh ïa ki kali kamai ban ïaid na Riatsamthiah hynrei ki dei ban ïaid beit na Jaïaw ter ter sha Mawkhar bad Motphran kaba yn pyntreikam naduh katei ka sngi ka 7 tarik u bnai Nohprah 2023.
Haba kren sha ki lad pathai khubor, u Bah Adelbert Nongrum u la ong ba kum u nongmihkhmat u la phai khmat bha ha kaba ïadei bad katei ka jingeh bad um kwah ban shongthait ban peit ïa katei ka bynta namar ka jingthrang hi ka long ban wanrah ïa ka jingkylla.
U Bah Adelbert u la ong ruh ba barabor hi ki jingeh ki mih ka dei na ka jingleh jong ngi ki paidbah kiba la shna hi dalade ïalade ïa kita ki jingeh kiba kynthup naduh ka jinglong khlemakor jong ki nongñiah taksi, ka jingpynhiar bad ka jingpynkiew ïa ki nongshong kali, ka jingïeng lymmuh kat shaba lap ba shem.
“Ngi phah ruh ka khubor ha ka tnad pulit lyngba u SP Traffic ba kum ki pulit ki dei ban leh ïa la ka jong ka kamram da kaba pyndonkam ïa ka aiñ”, la ong u Bah Adelbert.
U Bah Adelbert u la ong ruh ba hap ban kynnoh ïa ki paidbah ruh kumjuh kiba pyrkhat tang ïa ka jingsuk shimet bad u la ong ba ha ka pyrthei ka jingïabeh sha ki kam ki jam baroh ki ïa kyrkieh lut hynrei lyngba ki jingleh pat ka pynlong ïa baroh ba kin slem lut.
Ha kajuh ka por, u la kyntu ruh ïa kiba ñiah kali bad ïa ki paidbah ba kin don ïa ka jingkitkhlieh ba kumno ban ñiah ïa ki kali bad ruh kumno ban pynduh ïa ka jingdheng kali da kaba pyndonkam ïa ka khlieh lajong na ka bynta ka bit ka biang jong baroh lang.
“Kane ka jingïatreilang ka long kaba donkam palat namar ka dei kaba ktah ïa u paidbah bad ngi khot ïa ki paidbah ha kane ka por ba kin long kiba ïatreilang ryngkat khnang ba kane ka jingthmu jong ngi kan long kaba seisoh khamtam ba kan nym ktah ïa ka ïaid ka ïeng bad ka jingim kaba manla ka sngi”, la ong u Bah Adelbert.
Nalor ki nongïalam jong ki Dorbar Shnong, ha katei ka sngi la don lang ruh da u Superintendent of Police (SP) Traffic ka East Khasi Hills, u K. Prasad, u Deputy Superintendent of Police (DSP), u Officer-In-charge jong ka thanat Lumdiengjri bad kiwei kiwei.
