Shillong, Nohprah 08
U Myntri Sorkar ka Jylla u Bah Kyrmen Shylla uba dei ruh u MLA ka Khliehriat konstitwensi u la ong ba ka jingïalang kaba heh kan sa don ha u Kyllalyngkot na ka bynta ban twad jingmut na ki paidbah haba ïadei bad ka jingtyrwa ka Sorkar ban shna lynti rel.
U Bah Kyrmen u la ong ba ïa kane ka sienjam ban twad jingmut na ki paidbah la leh da kaba sngewthuh lang hapdeng jong u bad ka MLA ka NPP na Sutnga-Saipung konstiwensi ka Kong Santa Mary Shylla hadien ba la ïohi ba ka don ka jingïapher ka rukom pynpaw ki paid nongshong shnong ka East Jaiñtia Hills district haba ïadei bad ka lynti rel.
U la ong ba haba ïakynduh ïa ki briew ki don kiba kyrshan ki pynpaw ïa ki nongrim jong ki bad ki don kiba ym kyrshan. Kumta kaba donkam bad ka babha eh ka long ban pynlong da ka jingïakynduh lang ban ïohsngew na ki paidbah.
U la ong ba wat lada ym pat buh sngi hynrei ka jingïalang la kumno kumno kan sa don ha u Kyllalyngkot, 2024.
