Shillong, Nohprah 08
U CEM ka KHADC Bah Pynïaid Sing Syiem u la ïathuh ba ki don hapoh arhajar tylli ki dukan bar jylla kiba don ha Ïewduh hynrei ki dang bun ki bym don laisen khaïi.
Haba ïakren bad ki nongthoh khubor hadien ba la wai ka jingïalang sam khusnam ka Khasi Students’ Union (KSU) Sohïong Circle ïa ki samla pule, u Bah Pynïaid u la ong ba namar ba ka council ka duna nongtrei dei na kane ka daw bun ki dukan bar jylla ki ïoh leh mon.
U la ong ba dei na kane ka daw ba u hiar hi sha ki jaka khaïi ban leit peit bniah ïa ki dukan bar jylla ban sngewthuh ïa ka rukom pyntreikam.
U Bah Pynïaid u la pynshai ba ha ka por ba u Executive Member bad ki ophisar ka KHADC ki leit khynra laisen khaïi ïa ki dukan bar jylla sha Ïewduh ka dei ka jingbakla ka por bad ka jaka bad ka seng Khun Kynthei U Hynñiewtrep Association.
U la ong ba kane baroh ka dei ka jingbakla ban pynbeit ïa ka por bad jaka bad kumta u la kyntu ïa kane ka seng Khun Kynthei U Hynñiewtrep Association kin dang ïatreilang bad ka KHADC ban peit ïa ka jingwan shong dukan ki bar jylla ha Ïewduh khnang ban tehlakam ïa ka jingwan buhai shnong ki briew ba nabar.
U la ïathuh ba kane ka kynhun ka sngewkhïa haba ki iohi ba ki kynthei kin kit jynjar ha la ka ri lajong katba kiwei ki bar jylla kin wan khaïi suk khlem laisen khaii na KHADC.
