Mawkyrwat, Nohprah:
Ka Myntri ka tnat ka koit ka khiah jong ka sorkar jylla ka Kong Ampareen Lyngdoh ha ka Sngi Palei ha ryngkat ka jingdonlang u Bah Renikton Lyngdoh Tongkhar, MLA ka Mawkyrwat ka la leit ban hiar juip ïa ka Civil Hospital Mawkyrwat.
Haba kren sha ki nongthoh khubor, ka Kong Ampareen ka la pynpaw ïa ka jingkmen ban ïohi ïa ka jingtrei shitom ki doktor kiba la trei borbah bad hapdeng ka shiphew bnai kane ka jaka ai jingsumar ka la lah ban ai ka jingshakri kaba biang bad pura sha ki paidbah nongshong shnong jong ka dong ka thaiñ.
“Kane, ha ka jingpeit jong nga, nga la leit peit ïa ki hospital kiba bun bah ha ka jylla bad napdeng kine, nga la dei ban ai syrnod ban ñiew ïa ka Civil Hospital Mawkyrwat kum ka Model Hospital,” la ong ka Kong Ampareen.
Ka la ai ka jingïaroh ïa u Dr W Sutnga, Medical Superintendent, Sister Kharbhih ba hapoh ka jingïalam jong ki, la lah shisha ban ïohi ïa ka jingkylla sted hapoh kane ka jaka ai jingsumar.
Shuh shuh ka Kong Ampareen ka la pyntip ruh ba ki don haduh kumba 79 tylli ki shnong ki bym lait kali ha kane ka dong ka thaiñ bad namar kata ka sorkar ka la sngewdei ban pynbun ïa ki Sub-Centre lane ki Health & Wellness Centre sha kiba kum kita ki jaka na ka bynta ban ai jingshakri ïa u paidbah.
Ka la ïathuh ruh ba ka sorkar ka la don jingthmu ban pyntreikam ïa ka Drone Technology na ka bynta ban rah ïa ki dawai sha ki Sub-Centre kiba shitom ban poi kali. Nangta ka la ïohi ïa ka jingdonkam ban ai jinghikai ïa ki nongpynkha khun (DAIs) bad ban siew dor ïa ki.
Ka Myntri ka khot ka wer ruh ïa ki seng bad seng treimon sngewbha ba kin ym peit tang ïa ki jingduna hynrei ban wan shakhmat ban ai ka kti kamon ka kti ka diang ban ïatreilang bad ka sorkar.
Shuh shuh ka la pynpaw ïa ka jingdonkam ban pynsted ïa ka jingpyntreikam ïa ka Blood Bank unit. Ha kajuh ka por ka la pynpaw ïa ka jingdonkam ban phai khmat sha ki Non Communicable Disease kiba long ki dawbah jong ka jingduh noh jong ki mynsiem kum ka jingpang High Blood Pressure, Diabetes, Cancer, Tuberculosis da kaba kyntu ïa baroh ki nongtrei ban trei shitom bad ban ai ka jingshakri kaba bha na ka bynta ban kyntiew ïa ka koit ka khiah bad ban wanrah ïa ka roi ka par ha ka dong ka thaiñ.
Ha kane ka sngi la ïadonlang ka Kong YR Mawlong, Additional Deputy Commissioner ka South West Khasi Hills District, Dr HC Lyndem, Director, DBS (MI), Dr. Wanbudmi Sutnga, Medical Superintendent Civil Hospital Mawkyrwat, Dr FR Lartang, District Medical &Health Officer bad kiwei kiwei.
