Jowai, Nohprah 08
U Bah Tanly Lapasam na ka shnong Mootyrchiah, Laskeiñ Block, West Jaiñtia Hills District u long u nongrep ba nyngkong eh na ka distrik ban ïoh ïa ka khusnam “Millionaire Farmer of India” ha ka 7 tarik u bnai Nohprah, 2023 kaba la long ha PUSA Mela Ground, New Delhi.
Ha kane sngi la pynkup burom ïa bun ngut ki nongrep ka Ri India baroh kawei kiba kham shemphang bad minot ha ka kam rep kam riang bad ka ri jingri.
U Bah Lapasam u la ïoh pdiang ïa kane ka khusnam ryngkat ka jingsynran lang da u Dr. R. Suchiang, Subject Matter Specialist (Animal Husbandry & Veterinary) jong ka ïing treikam ka Krishi Vigyan Kendra, Jaiñtia Hills kaba don ha Wahïajer.
U Lapasam u long u nongrep uba trei shitom bad duriap bha ha ka ri jingri bad kumjuh ha ka rep ka riang. U long ruh u briew uba shemphang ha ka pyrkhat pyrdaiñ bad uba tih bniah bad wad sani kumno ban pynman bha ïa ka rep ka riang jong u.
U Lapasam u ri ïa ki jingri kum ki sniang bad ki syiar bad ha kajuh ka por u pynkha ïa ki symbai sniang bad die ïa ki jingbam syiar. Nalor kane, u rep ruh ïa u kba, ki jhur ki jhep, ka rep tit bad ri ngap da kaba pynwandur kum ka rukom rep kyllum.
Une u nongrep u long uba smat bad u la ïoh ïa shibun ki jinghikai bad jingkyrshan lyngba ka ka ïing treikam jong ka Krishi Vigyan Kendra, Jaiñtia Hills.
Katkum ka jingïathuh jong u, ka jingïohnong ka long kumba T.12 lak shi snem bad da kane u lah ban kyrshan ïa ka ïing ka sem, ha kajuh ka por ban nangpynïar ïa ka rep ka riang jong u na kawei ka snem sha kawei pat.
Une u nongrep u kyntu bad pynshlur ïa ki para nongrep ban trei shitom, ban minot thop kumjuh ban wad ïa ki rukom rep kiba kynsai bad kiba ïa dei dur katkum ka juk mynta khnang ba kin ïohnong bad shim ruh ïa ka rep ka riang kum ka lad kamai bad ha kajuh ka por ban ai kam ai jam ïa ki khynnah samla bad ki para nongrep.
