New Delhi, Nohprah 08 (UNI)
Ka MP ka seng Trinamool Congress, ka Mahua Moitra, ha ka Sngi Thohdieng ka la shah beh (Expel) na ka jinglong dkhot jong ka Lok Sabha halor ka jingkynnoh ba ka la shim da ka pisa ban buh jingkylli ïa ka sorkar BJP ha Parliament.
Ka jingshah beh ka Mahua ka long hadien ba ka Lok Sabha ka la pynmih da ka rai kaba ai jingmynjur ïa ka kaiphod ba la wanrah da ka ‘Ethics Committee’ jong ka Parliament kaba long pyrshah ïa katei ka MP na West Bengal. Kane ka Committee ka la ai jingmut ba dei ban beh noh ïa ka Mahua na ka jinglong dkhot ka Lok Sabha.
U Myntri ka tnat Parliamentary Affairs, u Prahlad Joshi, u la tyrwa ïa ka rai ban beh noh ïa ka Mahua na Lok Sabha hadien ba katei ka Committee ka la wanrah ïa ka kaiphod jong ka.
Na ka liang kiba bun ki MP ka Lok Sabha ki la ai jingmynjur da kaba rah sur ïa ka rai ba la tyrwa da u Joshi.
Hadien ba ka la shah beh, ki dkhot ka Liang Pyrshah ki la mih noh jyndat na Lok Sabha.
Na ka liang u Lam-phang ka Lok Sabha, u Om Birla, u khlem ailad ïa ka Mahua ba kan kren ha Ïingdorbar Thawaiñ halor ka jingai jingmut jong ka Ethics Committee da kaba ong ba ka la ïohlad ban kren ha ka Committee mynshwa.
Ha ka 6 tarik Naiwieng, ka ‘Ethics Committee’ ka Lok Sabha ka la ai jingmut ban beh noh ïa ka Mahua na ka jinglong MP halor ka jingkynnoh ba ka la shim da ka pisa ban buh jingkylli pyrshah ïa ka sorkar ha Parliament.
Nalorkata, ka Committee ka la ai jingmut ba ka sorkar ka dei ban thung da ka jingtohkit ban wad bniah halor kane ka jingleh jong ka Mahua.
Na ka liang ka Mahua ka la shah kynnoh ba ka la buh jingkylli ha Lok Sabha tang ban ïoh pynkylla sohpdung ïa u heh saipan ka Ri, u Gautam Adani da ka jingkynshoit jong uwei pat u heh saipan, u Darshan Hiranandani.
Katei ka MP ka la kyntait ïa ka jingkynnoh ba ka la shim pisa, hynrei ka la kubur pat ba ka la ai sha u Hiranandani ïa ki jingtip kiba u lah ban pyndonkam ïa ki kor ki bor jong ka Parliament lyngba ka Mahua.
Hadien ba ka la mih na Parliament, ka Mahua ka la ong, “Ka Ethics Committee kam don bor ban beh. Kane ka dei ka jingsdang jong ka jingkut ïa ka BJP. Kane ka Committee ka la ai ïa ka kaiphod hadien ba ka la ïoh pdiang da ki jingthoh na ki arngut ki briew, bad kita ki jingthoh ruh ki dei ki bym ïahap kawei na kawei pat.
Hynrei na ka liang ka BJP ka la kam ba ka Mahua ka la buh jingma ïa ka jingshngaiñ jong ka Ri da kaba ai ïa ki jingtip halor ki kor ki bor ban pyndonkam da u Hiranandani.
