Shillong, Nohprah:
Ki dukan die kot ha kylleng ka Jylla ki la kyrpad ïa ka Sorkar ban pynkynriah shuwa ïa ka jingthmu jong ka ban pyndonkam noh da ki kot pule ka NCERT hapoh ka Jylla.
“Ngi ki trai dukan bad ki nongdie kot ka Jylla ngi thoh sha phi ban pynpaw ka jingsngewkhia halor ka jingpynbna ba dang shen na ka liang ka Sorkar ban pyndonkam noh da ki kot pule ka NCERT ha ka tnad pule-puthi jong ka Jylla,” la ong ka kyrwoh ba la phah sha u Myntri Rangbah ka Jylla, u Conrad K. Sangma.
Ïa katei ka kyrwoh la soi da 30 tylli ki dukan die kot kiba don ha kylleng ka Jylla.
Ki la ong ba ki sngewthuh ïa ka jingminot ka Sorkar ban pynbha ïa ka jinglong-jingman ka pule-puthi hapoh ka Jylla, hynrei ha kajuh ka por ki kwah ban pynsngew halor katto-katne ki jingeh bad jingkyrpad kiba ki sngew ki long kiba donkam ïa ka jingpynleit jingmut kaba bniah.
“Ka jingpynbna ban pyndonkam noh da ki kot pule ka NCERT ka la wan kum ka jingkyndit ïa ngi bad ka por ba la ai sha ngi na bynta kane ka jingkylla ka long kaba lyngkot. Kane ka la ban khia ïa ngi ki nongdie kot ban pynkhreh ïa ka jingpynbit jingpynbiang ba donkam hapoh ka por kaba biang,” ki la ong.
Haba kdew ba ki kot ba pyndonkam da ka MBoSE kiba dang don mynta ki kynthup ïa ka jingpynlut kaba la kot sha ki klur tyngka, ki nongdie kot ki la pynpaw ba lada ka jingkynriah sha ki kot pule NCERT ka long noh mardor, kata kan pynbor ïa ki ban kyntait noh ïa ka mar barim, ha kawei ka liang ka ban ïalam sha ka jingduhnong kaba khraw ïa ki.
Nalor kane, ki la ong ruh ba la pynbeit ban sam ïa ki kot pule SSA naduh u snem ba la dep sha ki khynnah pule ha u snem 2024 bad kumta ka jingwanrah ïa ki kot pule ka NCERT kan pynlong ïa ki kot pule SSA ban ym donkam shuh.
Na ka liang ki trai dukan bad nongdie kot ki la pynsngew ba haduh mynta ki dang ïakhun sah ïa ka jinglong-jingman hadien ka khlam COVID-19, kaba la ktah shi kat dei ïa ka kam ka jam jong ki.
“Ka jingpynbna ba dang shen jong phi ka nang ban syrtap shuh ïa ka jingeh, kaba ktah pat ïa ka jingpyrshang jong ngi ban khyllie biang na ka jinghiar ka ïoh ka kot,” ki la ong.
Kumta ki la kyrpad ïa u Myntri Rangbah ban pyrkhat lem ha ka ban pynkynriah noh shuwa ïa ka jingpyndonkam ïa ki kot pule ka NCERT hapoh ka Jylla la kumno-kumno hadien u 2025.
“Kane kan ai por ïa ngi ban khmih shuwa ïa ki kot kiba la don lypa, pynkhreh ïa ka jingpynkylla bad pynduna ïa ka jingktah ha ka jinglut ha ka kam jong ngi,” la ong ki trai dukan bad ki nongdie kot.
Shuh shuh ki la bynrap, “Ngi ngeit skhem ba ka jingwanrah jingkylla kaba jai-jai bad kaba la pyrkhat bha kan shakri ïa ka bha ka miat jong kito kiba ïadon bynta, kynthup ka Sorkar, nongdie kot bad khamtam ïa ki khynnah pule.”
