Shillong, Nohprah 08
Namar ka jingpynslem ban pyllait ïa ka bai bam ne ka ‘scholarship’ na ka bynta ki samla pule jong ka jylla, na ka liang ka Student’s Wing jong ka Hynñiewtrep Integrated Territorial Organisation (HITO) dang shen ka la tuklar mardor halor kane ka jingeh jong ki samla pule ka jylla.
Ha kaba ïadei bad kane, ka Student’s Wing jong ka HITO ha ka 13 tarik u bnai Naiwieng 2023 ka la pan da ka jingpynshai na u Secretary ka tnad pule puthi ka sorkar jylla, u Ambrose Ch. Marak halor ka jingpynslem jong ka tnad pule ban pyllait ïa ka ‘Scholarship’ sha ki samla pule.
Haba jubab halor kane ka jingpan jingpynshai jong ka seng, na ka liang u Deputy Director of Higher & Technical Education ka tnad pule puthi ka sorkar jylla lyngba ka shithi sha ka Student’s Wing jong ka HITO ha ka 27 tarik u bnai Naiwieng 2023, ka la pyntip ba ka tnad ka dang ïai ap ïa ka bhah tyngka kaba dei ka ‘Scholarship’ na ka sorkar pdeng ban ai sha ki samla pule bad ka tnad ka la phah ruh da ka jingthoh sha ka tnad pule jong ka sorkar pdeng kata ha u bnai Jylliew 2023, bad ha u bnai Risaw 2023 la phah biang sa kawei ka jingthoh kum ka jingpynkynmaw halor kane.
U Assistant Secretary ka HITO Student’s Wing, u samla Kitshemphang Warjri u la ong ba ka sorkar jylla ka la pan na ka tnad pule puthi jong ka sorkar pdeng kumba T. 65 klur ban pyllait ïa ki ‘Scholarship’ skhim bapher bapher hynrei ym tip satia la hato kane ka long kaba dei ne ka bym dei bad kum ka seng kan sa buddien halor kane ka bynta.
“Lada ki pan T. 65 klur napoh ka tnad pule puthi jong ka sorkar kmie hynrei na ka liang jong kane ka tnad ka la ai haduh T. 100 klur, te kumta ngi kwah ban tip bad ban buh jingkylli balei 50% la pyllait ïa ki ‘Scholarship’ bad 50% pat dang shah bat?”, la buh jingkylli u samla Kitshemphang.
Shuh shuh utei u samla u la ong ba ka seng ka la buh da ka por kaba khadduh ba ka sorkar jylla ka dei ban pyllait lut ïa baroh ïa ki ‘Scholarship’ na ka bynta ki samla ka jylla kaba long ha ka 30 tarik u bnai Naiwieng 2023 lym kumta ka seng kan sa hap ban shim biang ïa ki sienjam sa shisien.
Utei u samla u la kyntu ïa ka sorkar jylla bad ïa ka tnad pule puthi ba kan pyllait noh ïa katei ka bai bam jong ki samla pule bad ban pynkiew ïa ka jinglong jingman ka pule puthi hapoh ka jylla namar kumba ka long ka pule ka puthi hapoh kane ka jylla ka la hiar shikatdei eh.
“Balei ba ka jylla Meghalaya kan dei tang ka jylla ka ban leh ïa ki kam tamasa lane ki kam shongshit?”, la buh jingkylli biang u samla Kitshemphang.
U samla Kitshemphang u la ong ruh ba lada ka sorkar kam pat pyllait ïa katei ka bai bam jong ki samla pule, ka seng kan sa leit ban ïakynduh noh ïa u Myntri Rangbah ka jylla, u Conrad K Sangma ba un shimkhia mardor ha kaba ïadei bad kane namar kiba bun ki khynnah samla ki dei kiba shaniah ha ka ‘Scholarship’ ha ka ban ïoh ban siew ïa ka bai klas ne ïa kiwei kiwei ki jingdonkam hapoh klas.
